మహిళలు రాత్రిపూట కాఫీ తాగితే ఏమవుతుందో తెలుసా..? పరిశోధనలో విస్తుపోయే విషయాలు..
కాఫీ అనేది రోజంతా మిమ్మల్ని హుషారుగా ఉంచే అద్భుతమైన పానీయమే కావచ్చు.. కానీ దాన్ని తాగే సమయం మారితే అది మీ ప్రవర్తనను పూర్తిగా మార్చేస్తుందని శాస్త్రవేత్తలు చెబుతున్నారు. పగటిపూట కాఫీ తాగితే ఏ సమస్య ఉండదు కానీ, రాత్రిపూట తాగితే మాత్రం మెదడులోని రసాయనాలు అస్తవ్యస్తమై తప్పుడు నిర్ణయాలు, అనవసరమైన ఆర్థిక రిస్కులు తీసుకునేలా ప్రేరేపిస్తాయట.
చాలా మందికి రాత్రి వేళల్లో ఆఫీస్ వర్క్ చేసేటప్పుడో లేదా స్టూడెంట్స్ చదువుకునేటప్పుడో వేడివేడి కాఫీ తాగడం ఒక అలవాటు. కాఫీలోని కెఫీన్ అలసటను దూరం చేసి, మనల్ని ఉత్సాహంగా ఉంచుతుందని నమ్ముతాం. అయితే రాత్రిపూట కాఫీ లేదా కెఫీన్ ఆధారిత పానీయాలు తీసుకోవడం వల్ల కేవలం నిద్ర పట్టకపోవడమే కాదు.. అంతకంటే ప్రమాదకరమైన మానసిక మార్పులు చోటుచేసుకుంటాయని తాజా పరిశోధనలు వెల్లడిస్తున్నాయి. రాత్రివేళల్లో కెఫీన్ తీసుకోవడం వల్ల ప్రవర్తనలో ఆవేశం విపరీతంగా పెరుగుతుందని, ముఖ్యంగా పురుషుల కంటే మహిళల్లోనే ఈ ప్రభావం చాలా ఎక్కువగా ఉంటుందని ఎల్ పాసోలోని టెక్సాస్ విశ్వవిద్యాలయం పరిశోధకులు తేల్చారు. ఈ షాకింగ్ అధ్యయనం ప్రముఖ ఐసైన్స్ జర్నల్లో ప్రచురితమైంది.
మెదడుపై రాత్రి కెఫీన్ దాడి.. పగలైతే ఓకే
టెక్సాస్ యూనివర్సిటీ పరిశోధన ప్రకారం.. రాత్రిపూట కెఫీన్ తీసుకున్నప్పుడు మన మెదడు తనను తాను నియంత్రించుకునే సెల్ఫ్ కంట్రోల్ శక్తిని క్రమంగా కోల్పోతుంది. దీనివల్ల లాజికల్గా ఆలోచించకుండా ఆవేశపూరితంగా నిర్ణయాలు తీసుకోవడం, అనవసరమైన రిస్క్లు ఫేస్ చేయడం వంటి నెగెటివ్ ప్రవర్తన పెరుగుతుంది. అయితే ఇక్కడే సైంటిస్టులు ఒక ఆశ్చర్యకరమైన విషయాన్ని గమనించారు. ఇదే కెఫీన్ను పగటిపూట తీసుకున్నప్పుడు మనుషుల ప్రవర్తనలో ఎలాంటి మార్పులు కనిపించలేదు. అంటే కెఫీన్ తీసుకునే సమయం మన మెదడు పనితీరును, విచక్షణను తీవ్రంగా ప్రభావితం చేస్తుందని ఈ రీసెర్చ్ స్పష్టం చేసింది.
మహిళలపైనే ఆ ప్రభావం ఎక్కువ.. ఎందుకు?
ఈ అధ్యయనంలో ఒక కీలకమైన జెండర్ వ్యత్యాసం వెలుగుచూసింది. పురుషులతో పోలిస్తే మహిళల్లో రాత్రిపూట కాఫీ తాగడం వల్ల వచ్చే ఆవేశం, చిరాకు చాలా ఎక్కువగా ఉన్నట్లు గుర్తించారు. దీనికి ప్రధాన కారణం స్త్రీల శరీరంలో ఉండే హార్మోన్లు, వారి మెటబాలిజం కెఫీన్కు భిన్నంగా స్పందించడమే. కెఫీన్ శరీరంలోకి వెళ్లినప్పుడు మెదడులో డోపమైన్, నోర్అడ్రినాలిన్ వంటి న్యూరోట్రాన్స్మిటర్స్ విడుదలవుతాయి. ఇవి మహిళల హార్మోన్లతో కలిసినప్పుడు వారి భావోద్వేగాల నియంత్రణను మరింత త్వరగా దెబ్బతీస్తాయి.
అసలు సైన్స్ ఏం చెబుతోంది?
సాధారణంగా మన శరీరం అలసిపోయినప్పుడు మెదడులో అడెనోసిన్ అనే రసాయనం విడుదలై మనల్ని ప్రశాంతమైన నిద్ర వైపు నడిపిస్తుంది. అయితే కాఫీలోని కెఫీన్ మెదడులోకి వెళ్లి, ఆ అడెనోసిన్ రిసెప్టర్లను బ్లాక్ చేస్తుంది. దీనివల్ల శరీరం నిద్రపోవడానికి సిద్ధమయ్యే రాత్రి సమయంలో.. మెదడు మాత్రం హఠాత్తుగా అతిగా ఉత్తేజం చెందుతుంది. ఈ అసమతుల్యత వల్ల విచక్షణ, భావోద్వేగ నియంత్రణ పూర్తిగా దెబ్బతింటాయి. ఫలితంగా.. అర్ధరాత్రి పూట ఆన్లైన్ షాపింగ్లలో అనవసరమైన ఆర్థిక తప్పుడు నిర్ణయాలు తీసుకోవడం, రాత్రిపూట డ్రైవింగ్ చేసేటప్పుడు ఓవర్ స్పీడ్తో అజాగ్రత్తగా ఉండటం వంటి ప్రమాదాలు పొంచి ఉంటాయని సైంటిస్టులు హెచ్చరిస్తున్నారు.
నిపుణుల హెచ్చరిక.. ఇదొక విషవలయం..
మనం పడుకునే కనీసం 6 గంటల ముందు నుంచే కాఫీ, టీ లేదా ఎనర్జీ డ్రింక్స్కు పూర్తిగా దూరంగా ఉండాలని ఆరోగ్య నిపుణులు, వైద్యులు సూచిస్తున్నారు. లేదంటే అది మిమ్మల్ని ఒక ప్రమాదకరమైన విషవలయం లోకి నెట్టేస్తుంది. అదెలాగంటే:
- రాత్రి కాఫీ తాగడం వల్ల నిద్రలేమి ఏర్పడుతుంది.
- మరుసటి రోజు ఉదయం ఆ నిద్రలేమి వల్ల తీవ్రమైన అలసట, నీరసం వస్తాయి.
- ఆ అలసటను పోగొట్టుకోవడానికి మళ్లీ పదే పదే కాఫీలు తాగుతారు.
- ఇది రాత్రి నిద్రను మరింత దూరం చేసి, దీర్ఘకాలిక మానసిక ఒత్తిడికి, యాంగ్జైటీకి దారితీస్తుంది.
చివరగా నిపుణులు చెప్పేదేంటంటే.. కాఫీ అనేది యాంటీఆక్సిడెంట్లు ఉన్న ఒక అద్భుతమైన పానీయమే, కానీ దానిని సరైన సమయంలో తీసుకోవడం చాలా ముఖ్యం. రాత్రిపూట కాఫీని పక్కన పెట్టి, ప్రశాంతమైన నిద్రకు ప్రాధాన్యత ఇవ్వడం వల్ల మీ శారీరక, మానసిక ఆరోగ్యం బాగుండటమే కాదు.. జీవితంలో మీరు తీసుకునే నిర్ణయాలు కూడా పక్కాగా ఉంటాయి.