మీకు ప్యాంట్ జేబుల్లో చేతులు పెట్టుకునే అలవాటు ఉందా.. అయితే మీ కేరక్టర్ ఇదే..

మనం రోడ్డుపై నడుస్తున్నప్పుడో, ఎవరితోనైనా మాట్లాడుతున్నప్పుడో లేదా ఎక్కడైనా క్యూలో నిల్చున్నప్పుడో.. చాలా సాధారణంగా చేసే పనేంటంటే, చేతులను ప్యాంట్ జేబుల్లో పెట్టేసుకోవడం. ఇది ఎంత క్యాజువల్‌గా జరిగిపోతుందంటే, మనం చేస్తున్నామనే విషయం మనకే గుర్తుండదు. కానీ ఇలా జేబుల్లో చేతులు పెట్టుకోవడం వెనుక ఒక పెద్ద మానసిక శాస్త్రమే దాగి ఉందని సైకాలజిస్టులు చెబుతున్నారు. ఈ చిన్న అలవాటు.. ఒక వ్యక్తి అంతరంగంలో ఎలాంటి భావోద్వేగాలు నడుస్తున్నాయి, ముఖ్యంగా సామాజికంగా ఒత్తిడి లేదా అనిశ్చితి ఎదురైనప్పుడు వారు మానసికంగా ఎలా ఫీల్ అవుతున్నారనేది నిశబ్దంగా బయటపెట్టేస్తుందట.

మాటల కంటే బాడీ లాంగ్వేజే పవర్‌ఫుల్

బాడీ లాంగ్వేజ్‌పై పరిశోధనలు చేసిన ప్రముఖ సైకాలజిస్ట్ డాక్టర్ ఆల్బర్ట్ మెహ్రాబియన్ ప్రకారం.. మనుషులు తమ మాటల కంటే ఎక్కువగా తమ హావభావాలు, శారీరక కదలికల ద్వారానే ఎక్కువ భావోద్వేగాలను వ్యక్తపరుస్తారు. మనం స్పృహలో లేనప్పుడు కూడా మన అంతర్గత ఆలోచనలను మన శరీరం అపస్మారకంగా ప్రదర్శిస్తూనే ఉంటుంది. అందులో ఈ జేబుల్లో చేతులు పెట్టుకోవడం అనేది ఒక ముఖ్యమైన సంకేతం.

ఆత్మరక్షణ కోసమేనా?

ది జర్నల్ ఆఫ్ నాన్‌వెర్బల్ బిహేవియర్‌లో ప్రచురితమైన అధ్యయనాల ప్రకారం.. మనుషులు మానసిక ప్రశాంతత లేదా రక్షణ కావాలనుకున్నప్పుడు కొన్ని రకాల రక్షణాత్మక బాడీ లాంగ్వేజ్‌ను ఆశ్రయిస్తారు. మన చేతులు అనేవి మన భావాలను వ్యక్తపరిచే అద్భుతమైన సాధనాలు. వాటిని జేబుల్లో దాచడం అంటే.. భావోద్వేగాలను నియంత్రించుకుంటున్నారనడానికి ఒక గుర్తు. అంతేకాకుండా ప్రముఖ సోషల్ సైకాలజిస్ట్ డాక్టర్ ఆమీ కడ్డీ తన పరిశోధనల్లో కీలక విషయాలు వెల్లడించారు. “మనుషులు మానసికంగా అసురక్షితంగా లేదా అనిశ్చితంగా భావించినప్పుడు, వారి శరీరాన్ని ముడుచుకుపోయేలా చేస్తారు.” జేబుల్లో చేతులు పెట్టుకుని, భుజాలు కాస్త వంచి, చూపులు కిందకు పెట్టి నడుస్తున్నారంటే.. వారు ఆ వాతావరణంలో అందరి దృష్టిని ఆకర్షించకుండా, ఆ పరిసరాల్లో కలిసిపోవడానికి ప్రయత్నిస్తున్నారని అర్థం.

ఇది ఇన్ సెక్యూరిటీ కాదు.. ఎమోషనల్ ప్రైవసీ

అయితే, జేబుల్లో చేతులు పెట్టుకున్న ప్రతి ఒక్కరూ ఆత్మవిశ్వాసం లేనివారని అనుకుంటే పొరపాటే. టొరంటో విశ్వవిద్యాలయం చేసిన సామాజిక అధ్యయనాల ప్రకారం.. అంతర్ముఖులు లేదా కాస్త రిజర్వ్‌డ్‌గా ఉండే వ్యక్తులు తమ మానసిక ప్రశాంతతను కాపాడుకోవడానికి ఇలాంటి క్లోజ్డ్ బాడీ పోస్చర్స్ అలవాటు చేసుకుంటారు. ప్రముఖ సైకాలజిస్ట్ డాక్టర్ సుసాన్ క్రాస్ వైట్‌బోర్న్ దీనిపై మాట్లాడుతూ.. “ఇది ఒక రకమైన భావోద్వేగ నియంత్రణ. బయటి వాతావరణం నుండి వచ్చే ఒత్తిడిని లేదా అతిగా స్పందించడాన్ని అదుపు చేయడానికి కొందరు తమ వ్యక్తీకరణను ఇలా నియంత్రించుకుంటారు” అని వివరించారు.

సమాజంలో ఉన్నప్పుడు ఈ అలవాటు ఏం సూచిస్తుంది?

పర్సనాలిటీ అండ్ ఇండివిడ్యువల్ డిఫరెన్సెస్ జర్నల్ ప్రకారం.. నలుగురిలో ఉన్నప్పుడు లేదా కొత్త వ్యక్తులతో మాట్లాడుతున్నప్పుడు స్థిరంగా చేతులను జేబుల్లోనే ఉంచే వ్యక్తులు, తమ అభిప్రాయాలను గట్టిగా చెప్పడానికి లేదా ఇతరులతో త్వరగా కనెక్ట్ అవ్వడానికి కాస్త సమయం తీసుకుంటారు. వారి వద్ద చెప్పడానికి విషయాలు లేవని కాదు.. కానీ వారు ముందే తొందరపడకుండా, ఆ వాతావరణం తమకు సురక్షితమేనా అని నిశబ్దంగా అంచనా వేస్తుంటారు. వీరు సమాజంలో ఆధిపత్యం కంటే మానసిక భద్రతకే ఎక్కువ ప్రాధాన్యత ఇస్తారు.

ఎవరూ ఒప్పుకోని ఒక అసలు నిజం

సైకలాజికల్ సైన్స్ పరిశోధనల ప్రకారం.. మనుషులు తమ మనసులో ఏదైనా తీవ్రంగా ఆలోచిస్తున్నప్పుడు లేదా ఏదైనా ఒక వ్యక్తిగత నిర్ణయాన్ని బేరీజు వేసుకుంటున్నప్పుడు శరీర కదలికలను తగ్గించేస్తారు. అప్పుడు చేతులు ఆటోమేటిక్‌గా జేబుల్లోకి వెళ్లిపోతాయి. అంటే ఇది ఇతరుల నుండి దాక్కోవడం కోసం కాదు.. తమ అంతరంగంలోకి తాము తొంగిచూడటానికి చేసే ఒక ప్రక్రియ.

అవగాహన ముఖ్యం..

ఏ ఒక్క చిన్న అలవాటుతోనే ఒకరి వ్యక్తిత్వాన్ని పూర్తిగా జడ్జ్ చేయలేము. కానీ అంతర్జాతీయ పరిశోధనల ప్రకారం.. ఎల్లప్పుడూ చేతులను ఓపెన్‌గా ఉంచి మాట్లాడే వ్యక్తులను సమాజంలో సులభంగా నమ్ముతారు. వారు అందరికీ అందుబాటులో ఉండే వ్యక్తులుగా కనిపిస్తారు. అందుకే లీడర్స్, పబ్లిక్ స్పీకర్లకు చేతులు కనిపించేలా మాట్లాడాలని ట్రైనింగ్ ఇస్తారు.

చివరిగా డాక్టర్ వైట్‌బోర్న్ చెప్పినట్లు.. బాడీ లాంగ్వేజ్ అనేది ఒకరిని జడ్జ్ చేయడానికి కాదు, వారి మనసులోని ఆలోచనలను అర్థం చేసుకోవడానికి మాత్రమే. కాబట్టి ఎప్పుడు మనల్ని మనం క్లోజ్ చేసుకోవాలో, ఎప్పుడు ఓపెన్ అప్ అవ్వాలో తెలుసుకోవడమే ఇక్కడున్న అసలు ట్రిక్.