ఏపీ సీఎం జగన్‌కు కేంద్రం షాక్.. ఎందుకో తెలుసా?

పరిపాలనలో తన మార్క్ చూపిస్తూ వస్తున్న ఏపీ సీఎం జగన్ ఇప్పటికే పోలవరం పనుల్లో రివర్స్ టెండరింగ్‌పై అనుకున్నది సాధించారు. దీనిద్వారా భారీగా డబ్బు ఆదా అవుతున్న విషయంపై జగన్ తీసుకున్న నిర్ణయంపై సర్వత్రా హర్షం వ్యక్తమవుతుంది. అయితే అదే పద్ధతిలో గత ప్రభుత్వం విద్యుత్ కొనుగోళ్లకు సంబంధించి చేసిన ఒప్పందాలను సమీక్షించాలని కూడా నిర్ణయించారు. ఈ విషయంలో ఏపీ ప్రభుత్వానికి కేంద్రం లేఖ రాసింది. పీపీఏల వ్యవహారంలో మరోసారి ఆలోచించాలని, ఏపీ ప్రభుత్వం తీసుకున్న నిర్ణయం సరికాదంటూ కేంద్ర ఇంధన శాఖ మంత్రి ఆర్కే సింగ్.. సీఎం జగన్‌కు లేఖ రాశారు. వాటికి మరోసారి సమీక్షించాల్సిన అవసరం లేదని ఆలేఖలో మంత్రి పేర్కొన్నారు.

గత ప్రభుత్వ హాయాంలో విద్యుత్ కొనుగోళ్ల విషయంలో భారీగా అవకతవకలు జరిగాయని, వీటిని మరోసారి సమీక్షించనున్నట్టు ప్రధాని మోదీకి సీఎం జగన్ జూలై 25న ఓ లేఖ రాశారు. అయితే ఈ లేఖను ప్రధామంత్రి కార్యాలయం ఇంధన శాఖకు పంపింది. దీంతో ఆ శాఖ మంత్రి ఆర్కే సింగ్ స్పందిస్తూ సీఎం జగన్‌కు లేఖ రాశారు. మీరు సమీక్ష చేయాలనుకుంటున్న మూడు సంస్ధల కెపాసిటీ 2014 కంటే ముందే కేంద్ర ప్రభుత్వానికి తెలుసునని, అందువల్ల వీటిని సమీక్షించాల్సిన అవసరం లేదని మంత్రి ఆ లేఖలో పేర్కొన్నారు. ఈ విధంగా సమీక్ష జరిపితే దాని ప్రభావం పెట్టుబడిదారులతో పాటు దేశ విద్యుత్ రంగ విధానంపై తీవ్రంగా ఉండే అవకాశాలున్నాయని మంత్రి తెలిపారు. విద్యుత్ కొనుగోళ్ల విషయంలో ప్రతి ఏడాది ధరలు మారిపోతూ ఉంటాయనే విషయాన్ని ఏపీ ప్రభుత్వం పరిగణలోకి తీసుకోవాలని తెలిపారు.