చైనాలో విషాదం.. భారీ వర్షాలకు 141 మంది మృతి..

చైనాలో మరో విషాదం చోటుచేసుకుంది. ప్రకృతి డ్రాగన్ కంట్రీపై పగబట్టినట్లు ఉంది. వరుసగా కొద్ది రోజుల నుంచి కురుస్తున్న భారీ వర్షాలతో స్థానిక ప్రజలు తీవ్ర ఇబ్బందులు పడుతున్నారు. తాజాగా గురువారం కురిసిన భారీ వర్షానికి యాంగ్జీనది ఉప్పొంగి పోతోంది. యాంగ్జీనది ఎగువ పరిధిలోని పర్వత పట్టణమైన చాంగ్‌క్వింగ్‌లో పెద్ద ఎత్తున కొండచరియలు విరిగిపడ్డాయి. అంతేకాదు వరద నీరు వచ్చి చేరడంతో.. పలు ప్రాజెక్టులు ఒక్కసారిగా నిండిపోయాయి. దీంతో అధికారులు ఎప్పటికప్పుడు నీటిని దిగువకు విడుదల చేస్తున్నారు. ఇక యాంగ్జీనదిపై నిర్మించిన రిజర్వాయర్‌లోకి శుక్రవారం ఉదయం 10.00 గంటల వరకు సెకనుకు 50 వేల క్యూసెక్కుల వరద నీరు వచ్చి చేరింది. దీని వేగం మరింత పెరిగే అవకాశం ఉన్నట్లు అధికారులు తెలిపారు. యాంగ్జీనదితోపాటు త్రీగోర్జస్‌ రిజర్వాయర్‌లో నీటిమట్టం అంతకంతకూ పెరుగుతోంది. ఈ భారీ వర్షాలకు వచ్చిన వరదలకు చైనాలో ఇప్పటి వరకు 141 మంది మరణించారు. అనేక మంది తీవ్రంగా గాయపడ్డారు. ఈ విషయాన్ని చైనా అధికారులు తెలిపారు.