‘మర్డర్’ సినిమా ప్రదర్శనకు రక్షణ కల్పించాల‌ని పోలీసులను కోరిన చిత్ర నిర్మాత నట్టి కుమార్‌..

సంచలన దర్శకుడు రామ్ గోపాల్ వర్మ తెరకెక్కించిన  మర్డర్ సినిమా ఈ నెల 24న విడుదల కానున్న విషయం తెలిసిందే. మిర్యాలగూడలో జరిగిన పరువు హత్య నేపథ్యంలో ఈ సినిమా తెరకెక్కిస్తున్నారని మొదటినుంచి ఆరోపణలు వస్తున్నాయి. వర్మ మాత్రం అలాంటిదేమి లేదు అని చెప్పుకొస్తున్నారు. ఈ నేపథ్యంలో మర్డర్‌ సినిమాకు అనుమతి, థియేటర్లలో సినిమా ప్రదర్శనకు రక్షణ కల్పించాల‌ని చిత్ర నిర్మాత నట్టి కుమార్‌ సోమవారం నల్లగొండ జిల్లా ఎప్పీ రంగనాథ్‌ను కలిశారు. మర్డర్ సినిమా విడుదల సందర్భంగా నల్గొండకు వాల్ పోస్టర్స్ ను పంపితే అవి అంటించకుండా ఇరు కుటుంబాల వారు అడ్డుకుంటున్నారని నట్టికుమార్ తెలిపారు. ప్రభుత్వ నిబంధనల మేరకు హైకోర్టు ఆదేశాల ప్రకారమే చిత్రాన్ని విడుదల చేస్తున్నామని ఆయన తెలిపారు.  ఈ సినిమా ఎవ్వరిని ఉద్దేశించి తీయలేదని ఒక తల్లి , తండ్రి, కూతురు మధ్య జరిగిన విషయాన్నే సినిమాగా తీసామని నట్టికుమార్ అన్నారు. ఇక మర్డర్‌ సినిమా ప్రదర్శించే థియేటర్‌ వారికి ధైర్యం కల్పించడం కోసమే రాంగోపాల్‌వర్మ మిర్యాలగూడ లో విలేకరుల సమావేశం ఏర్పాటు చేసినట్లు నిర్మాత నట్టికుమార్ పేర్కొన్నారు.