పాపరైపోతోన్న పలావ్..

ఇప్పటి వరకూ నేరుగా సత్తా చాటి ప్రజల్ని బ్రతుకు జీవుడా.. అనిపించిన కరోనా వైరస్ ఇప్పుడు పరోక్ష ప్రభావాన్ని చూపుతోంది. దీని పుణ్యమాని ప్రపంచ వ్యాప్తంగా ఆయా దేశప్రజల స్థితిగతులు, ఆర్థిక వ్యవస్థలు తీవ్రంగా ప్రభావితమౌతున్నాయి. వైరస్ కు దొరకకుండా బ్రతుకు సాగిస్తోన్న దేశాలకు సైతం కరోనా సెగ తాకుతోంది. పసిఫిక్ మహాసముద్ర ద్వీపదేశాల్లో కరోనా వైరస్ కాలుమోపనప్పటికీ ఆయా దేశాల ఆర్థికవ్యవస్థలను మాత్రం అతలాకుతలం చేస్తోందీ కరోనా.

వైరస్ ప్రభావంతో ‘పలావ్’ దేశం తన సరిహద్దులను మార్చి నెలాఖరు నుంచి మూసివేసి ముందస్తు జాగ్రత్తలు పాటించింది. ఫలితంగా వైరస్ ఆదేశంలో కాలుమోపలేకపోయింది. అయితే, దేశ ప్రధాన ఆదాయవనరైన టూరిజం రంగం మొత్తం స్థంభించిపోయింది. విదేశీ పర్యాటకులెవరూ దేశంలోకి రాకపోవడంతో అనేక రంగాలు కుదేలైపోయాయి.

అంతర్జాతీయ ద్రవ్యనిధి సంస్థ(IMF) చెబుతోన్న వివరాలప్రకారం పలావ్ దేశ స్థూల జాతీయోత్పత్తిలో 40శాతం పర్యాటక రంగం ద్వారానే వస్తుండటం.. అదే రంగం మొత్తం ఖాళీ కావడంతో ఆ దేశం ప్రస్తుతం గడ్డు పరిస్థితులను ఎదుర్కొంటోంది. గతేడాది పలావ్ దేశానికి వచ్చిన పర్యాటకుల సంఖ్య 92 వేలుకాగా, ఇది ఆదేశ జనాభాకంటే ఐదు రెట్లు అధికం. దీంతో పలావ్ ప్రజలు చేతిలో చిల్లిగవ్వలేని పరిస్థితుల్ని చవిచూస్తున్నారు.