ఎలక్ట్రిక్ స్కూటర్ల రంగంలో మరో అడుగు వేసిన ప్రముఖ రైడ్ షేరింగ్ కంపెనీ.. భవిష్యత్తును ముందుగానే ఊహించిన ఓలా.

ola planning to set up charging stations: రోజురోజుకీ పెట్రోల్, డీజిల్ ధరలు పైపైకి వెళుతుండడం.. ఇంధన వినియోగంతో వాయు కాలుష్యం పెరుగుతుండడంతో ఇప్పుడు ప్రభుత్వాలన్నీ ఎలక్ట్రిక్ వాహనాలపై దృష్టి సారిస్తున్నాయి. ఇందులో భాగంగానే ఎలక్ట్రిక్ వెహికిల్స్‌ను ప్రోత్సహించే క్రమంలో కేంద్ర, రాష్ట్ర ప్రభుత్వాలు పలు రాయితీలు ప్రకటిస్తున్న విషయం తెలిసిందే. ఇదంతా చూస్తుంటే భవిష్యత్తు అంతా ఇక ఎలక్ట్రిక్ వాహనాలదే అనిపిస్తోంది కదూ.. ఈ విషయాన్ని ముందుగానే గుర్తించింది ప్రముఖ రైడ్ షేరింగ్ కంపెనీ ఓలా. ఇందులో భాగంగానే దేశ వ్యాప్తంగా 50 నగరాల్లో ఎలక్ట్రిక్ టూ వీలర్స్ కోసం చార్జింగ్ స్టేషన్లను ఏర్పాటు చేసే దిశగా అడుగులు వేస్తోంది. అంటే ఇప్పుడు రోడ్లపై పెట్రోల్ బంకులు ఉన్నట్లుగానే చార్జింగ్ స్టేషన్లు రానున్నాయన్నమాట. ఇదిలా ఉంటే ఎలక్ట్రిక్ స్కూటర్ల తయారీ ప్లాంటు స్థాపించేందుకు ఓలా ఇటీవల తమిళనాడు ప్రభుత్వంతో ఒప్పందం చేసుకుంది. రూ.2,400 కోట్ల పెట్టుబడి పెట్టనున్న ఈ ప్లాంట్ ఏడాదిలో కార్యరూపంలోకి రానుంది. దీంతో ఈ ప్లాంట్ ఎలక్ట్రిక్ స్కూటర్ల తయారీలో ప్రపంచంలోనే అతి పెద్దది కానుంది. ఇదిలా ఉంటే ఓలా భారత్‌లోనే కాకుండా యూరప్‌లోనూ చార్జింగ్ స్టేషన్ల కోసం కావాల్సిన స్థలాన్ని వెతికే పనిలో పడింది. ఏది ఏమైనా ఓలా లాంటి బడా కంపెనీలు ఎలక్ట్రిక్ వెహికిల్స్ తయారీ రంగంలోకి వస్తుండడం శుభపరిణామమని చెప్పాలి.