మాస్క్ ధరించమన్నందుకు ‘గన్’‌ గురి పెట్టాడు

కరోనా వైరస్‌ వ్యాప్తిని అరికట్టేందుకు, కరోనా సోకకుండా ఉండేందుకు మాస్క్ ధరించాలంటూ ప్రపంచ ఆరోగ్య సంస్థ హెచ్చరిస్తూనే ఉంది. ఈ క్రమంలో దాదాపుగా అన్ని దేశాలు మాస్క్‌ను తప్పనిసరి చేశాయి. కొన్ని దేశాలైతే ఇంకాస్త ముందడుగు వేసి మాస్క్ లేకపోతే ఫైన్లను వేస్తోంది. అయితే ఎంత అవేర్‌నెస్‌ చేసినా కొందరు మాత్రం మారడం లేదు. మాస్క్‌ను ధరించడం పెద్ద ఇబ్బందిగా ఫీల్ అవుతున్నారు. ఈ నేపథ్యంలో వారికి ఎవరైనా మాస్క్ ధరించు అని చెప్పడం కూడా తప్పైపోతోంది. చెప్పిన వారిపై దాడులకు పాల్పడుతున్నారు. తాజాగా అమెరికాలోనూ అలాంటి ఘటనే చోటుచేసుకుంది. మాస్క్‌ ధరించిమని అడిగినందుకు ఫ్లోరిడాలోని వాల్డ్‌మార్డ్‌ స్టోర్‌లో తోటి షాపర్‌కి గన్ గురి పెట్టాడు విన్సెంట్ స్కావెట్టా అనే వ్యక్తి. షాపర్ కుమార్తెను కూడా ఈ సందర్భంగా విన్సెంట్ బెదిరించాడు. ఈ విషయం తెలిసిన పోలీసులు అతడిని అరెస్ట్ చేసి పీబీసీ జైలుకి తలరించారు.

జైలులోకి అతడి రాకపై స్పందించిన పీబీసీ జైలు ఆఫీస్‌.. ”పీబీసీ జైలులోకి నీకు స్వాగతం. ఇది నీకో గుణపాఠంగా మిగులుతుంది. చివరకు చాలా ఇబ్బందిగా ముగుస్తుంది” అని కామెంట్‌ పెట్టారు. కాగా అమెరికాలో మాస్క్‌ ధరించేందుకు చాలా మంది విముఖత వ్యక్తం చేస్తోన్న విషయం తెలిసిందే. మొన్నటివరకు దేశాధ్యక్షుడు డొనాల్డ్ ట్రంప్ సైతం మాస్క్ ధరించలేదు. అయితే ఇటీవల కాలంలో పంథా మార్చుకున్న ట్రంప్‌.. మాస్క్‌తో కనిపిస్తున్నారు.