అదే భయం, బ్రిటన్ తరువాత ఇప్పుడు దక్షిణాఫ్రికా, విమాన సర్వీసులను రద్దు చేసిన 5 దేశాలు, క్వారంటైన్ గడువూ
బ్రిటన్ మ్యుటెంట్ కరోనా వైరస్ భయం అన్ని దేశాలనూ వణికిస్తోంది. దీనిపై ఆందోళన అనవసరమని అమెరికాలోని కొందరు నిపుణులు, ఇతర శాస్త్రజ్ఞులు చెబుతున్నా ఈ భయం మాత్రం పలు దేశాలను..
బ్రిటన్ మ్యుటెంట్ కరోనా వైరస్ భయం అన్ని దేశాలనూ వణికిస్తోంది. దీనిపై ఆందోళన అనవసరమని అమెరికాలోని కొందరు నిపుణులు, ఇతర శాస్త్రజ్ఞులు చెబుతున్నా ఈ భయం మాత్రం పలు దేశాలను వీడడంలేదు. తాజాగా సౌతాఫ్రికా నుంచి వచ్ఛే విమానాలను 5 దేశాలు రద్దు చేస్తూ నిర్ణయం తీసుకున్నాయి. జర్మనీ, టర్కీ, ఇజ్రాయెల్, స్విట్జర్లాండ్, సౌదీ అరేబియా దేశాలు తమ దేశాల నుంచి అక్కడికి వెళ్లే విమానాలను కూడా రద్దు చేస్తున్నట్టు ప్రకటించాయి. దక్షిణాఫ్రికాలో సార్స్ -కొవ్-2 వైరస్ ప్రబలమవుతోందని, ఇది కూడా మ్యుటెంట్ వైరస్ వంటిదేనని వస్తున్న వార్తలతో ఈ దేశాలు విమానాలను నిలిపివేశాయి. ఇజ్రాయెల్ ఈ నెల 20 నుంచే తమ విమాన సర్వీసులను నిలిపివేయగా ఇతర దేశాలు నిన్నటి నుంచి బ్యాన్ చేశాయి. ఇజ్రాయెల్ ఓ అడుగు ముందుకేసి.. సౌతాఫ్రికా నుంచి తమ దేశానికి వచ్ఛే వారు తప్పనిసరిగా 30 రోజులపాటు క్వారంటైన్ కి వెళ్లాలని ఆదేశించింది. అలాగే తమ దేశం నుంచి అక్కడికి వెళ్లేవారిపై ట్రావెల్ బ్యాన్ విధించింది. అటు- ఆరోగ్య వంతులైన యువకులు కూడా సార్స్-కొవ్-2 బారిన పడడంపట్ల దక్షిణాఫ్రికా అధ్యక్షుడు తీవ్ర ఆందోళన వ్యక్తం చేశారు. సౌతాఫ్రికాలో ఈ కొత్త వైరస్ ఈస్ట్రన్ కేప్, క్వాజులు, వెస్టర్న్ కేప్ వంటి రాష్ట్రాల్లో కనిపిస్తోందని డాక్టర్లు చెబుతున్నారు.