నాడు వంటలక్క.. నేడు కోటికి పడగెత్తింది

బిగ్ బీ అమితాబ్ బచ్చన్ హోస్ట్‌గా వ్యవహరిస్తున్న ‘కౌన్ బనేగా కరోడ్‌పతి’ ప్రోగ్రాంకు బుల్లితెరపై విశేష స్పందన లభిస్తున్న సంగతి తెలిసిందే. ఈ షో సామాన్యులకు ఓ వరం అని చెప్పవచ్చు. సరస్వతి కటాక్షంతో లక్ష్మీదేవిని పొందడానికి ఈ షో వారికి చక్కని వేదిక అయింది. 2000లో మొదలైన ఈ షో ఇప్పటికే 10 సీజన్స్ పూర్తి చేసుకుని.. 11వ సీజన్‌ను ప్రారంభించింది. ఎప్పటిలానే ఈ షో మరో నిరుపేదను కోటీశ్వరురాలిని చేసింది. బబితా థాడే.. ఎక్కడో మహారాష్ట్రలోని మారుమూల గ్రామంలో నివసించే ఈమె.. ఇప్పుడు భారతదేశంలో ఓ సంచలనం. ‘కౌన్ బనేగా కరోడ్‌పతి’ సీజన్ 11 ఆమెను కోటీశ్వరురాలిని చేసింది. యువతకు స్ఫూర్తినిచ్చే ఆమె జీవిత జర్నీ గురించి ఇప్పుడు తెలుసుకుందాం.

మహారాష్ట్రలోని గవర్నమెంట్ పాఠశాలలో బబితా వంటమనిషిగా పనిచేసేవారు. నెలకు రూ.1500 జీతంతో బ్రతుకు జట్కా బండిని నడిపిస్తూ పోరాటం సాగించేవారు. ఉన్నదానితో కడుపు నింపుకుని.. లేకపోతే పస్తులు ఉంటూ జీవనాన్ని గడిపే నిరుపేద. తన పేదరికాన్ని పట్టించుకుని బాధపడకుండా ప్రతిరోజూ పాఠశాలలో తన కర్తవ్యాన్ని నిర్వర్తించేవారు. 450 పిల్లలకు రోజూ చక్కని భోజనం వండి పెడుతూ.. వారి సంతోషంలోనే తన ఆనందాన్ని వెతుక్కునేవారు. బబితా అసలే చెయ్యి తిరిగిన వంటమనిషి.. ఆమె ‘కిచిడీ’ చేయడంలో స్పెషలిస్ట్. ఎప్పుడు ‘కిచిడీ’ చేసినా.. పిల్లలు ఇష్టంగా తినేవారు. ఇలా సాధారణంగా సాగుతున్న జీవితంతో అక్కడే ఉండిపోకూడదని దృఢ నిశ్చయం తీసుకుంది. గొప్పగా ఏదో ఒకటి సాధించాలని కలలు కన్నారు. దానికోసం నిరంతరం కృషి చేశారు. అలా ఆమెను అదృష్టం తలుపు తట్టింది. ‘కౌన్‌ బనేగా కరోడ్‌పతి’కి ఆమె ఎంపికయ్యారు. బిగ్ బీ ఎదురుగా హాట్ సీట్‌లో ఆమె ఆసీనులయ్యారు.

ఈ క్విజ్ షోలో ఆమె ఎన్నో కఠిన ప్రశ్నలను ఎదుర్కొన్నారు. ‘స్లమ్‌డాగ్ మిలినియర్’ సినిమాలో చూపించినట్లు.. బ్రతుకు సమరంలో నిత్యం గెలుస్తున్న సామాన్యులకు ఎంత కష్టమైన ప్రశ్నలైనా చిన్నవిగా ఉంటాయి. సరిగ్గా అలాగే బబితా థాడే కూడా ఆ ప్రశ్నలకు సులువుగా సమాధానాలు ఇచ్చారు. ఒక్కో రౌండ్ దాటుకుంటూ వచ్చారు. చివరికి కోటి రూపాయల ప్రశ్న ఎదురైంది. ఆ క్షణంలో ఆమెతో పాటు అక్కడ ఉన్న అందరికీ గుండె వేగం రెట్టింపు అయ్యింది. నరాలు తెగే ఉత్కంఠ.. అయినా ఆమె బెదరకుండా సమాధానం ఇచ్చారు. ఇక అందరూ కూడా బిగ్‌బి స్పందన కోసం ఎదురు చూశారు. ఇక బిగ్‌బి ఒక్కసారిగా ‘కరెక్ట్‌ ఆన్సర్‌. ఏక్‌ క్రోర్’ అనడంతో షోకి వచ్చిన వాళ్లకు ఆనందం. బబితా కళ్ళలో భావోద్వేగం కనిపించాయి. నెలకు రూ. 1500 జీతాన్ని అందుకునే ఓ సాధారణ మహిళ.. ఇప్పుడు కోటీశ్వరురాలుగా మారింది. కృషితో సుసాధ్యం కానీ పని ఉండదని మరోసారి బబితా థాడేతో నిరూపితమైంది. ఈమె ఎపిసోడ్ ఇంకా టీవీలో ప్రసారం కానప్పటికీ.. ప్రోమో టెలికాస్ట్ అయిన రోజు నుంచే బబితా థాడేకు ప్రశంసలు వెల్లువెత్తాయి.