తెలంగాణ రైతులకు శుభవార్త.. సీఎం కేసీఆర్ గ్రీన్ సిగ్నల్.. డిసెంబర్ 27వ తేదీ నుండి నేరుగా వారి ఖాతాల్లోకే..

ఈనెల 27వ తేదీ నుండి జనవరి 7వ తేదీ వరకు రైతులకు ‘రైతుబంధు’ సాయాన్ని అందించనున్నట్లు రాష్ట్ర ముఖ్యమంత్రి కేసీఆర్ ప్రకటించారు. రెండో విడత రైతుబంధు సాయం(యాసంగి సీజన్) పంపిణీకి సంబంధించి సోమవారం ప్రగతి భవన్‌లో సీఎం కేసీఆర్ సమీక్ష నిర్వహించారు. ఈ సమీక్షలో రాష్ట్ర వ్యవసాయ శాఖ మంత్రి నిరంజన్ రెడ్డి, ప్రభుత్వ ప్రధాన కార్యదర్శి సోమేష్ కుమార్, ఆర్థిక శాఖ ముఖ్య కార్యదర్శి రామకృష్ణ రావు, వ్యవసాయ శాఖ ముఖ్య కార్యదర్శి జనార్ధన్ రెడ్డి, ఇతర ఉన్నతాధికారులు పాల్గొన్నారు. ఈ సందర్భంగా మాట్లాడిన ముఖ్యమంత్రి.. రాష్ట్రంలో ఏ ఒక్క రైతు మిగలకుండా అందరికీ రైతుబంధు సాయం అందించాలని అధికారులకు దిశానిర్ధేశం చేశారు. తక్కవ విస్తీర్ణం కలిగిన రైతులు మొదలు.. ఎక్కువ విస్తీర్ణం కలిగిన రైతుల వరకు అందరికీ పది రోజుల్లోగా డబ్బులు అందజేయాలన్నారు. సంబంధిత సొమ్మును నేరుగా రైతుల ఖాతాల్లోనే జమ చేయాలని అధికారులను సీఎం ఆదేశించారు. ఇందుకు అవసరమైన రూ.7,300 కోట్లను విడుదల చేయాలని ఆర్థిక శాఖ అధికారులను సీఎం కేసీఆర్ ఆదేశించారు. ఇదిలాఉండగా, రైతులు యాసంగికి వ్యవసాయ పనులు ఇప్పటికే మొదలు పెట్టారు. సీఎం కేసీఆర్ నిర్ణయంతో రైతులు సంతోషం వ్యక్తం చేస్తున్నారు.