కాశ్మీర్ పై చైనా ‘ అత్యుత్సాహం ‘.. ఐరాసలో చర్చకు పట్టు

జమ్మూకాశ్మీర్ విషయంలో చైనా మరీ ‘ అత్యుత్సాహం ‘ ప్రదర్శిస్తోంది. ఆ రాష్ట్రానికి సంబంధించి ఐక్యరాజ్యసమితి భద్రతా మండలిలో చర్చ జరగాలని మళ్ళీ కోరింది. సరిహద్దుల సమస్యపై భారత్-చైనా మధ్య చర్చలు జరగనున్న నేపథ్యంలో ఈ డిమాండ్ తిరిగి తెరపైకి వచ్చింది. (ఈ వారంలో చైనా విదేశాంగ మంత్రి వాంగ్ యీ .. ఇండియాను సందర్శించి జాతీయ భద్రతా సలహాదారు అజిత్ దోవల్ తో దీనిపై చర్చించనున్నారు). నిజానికి గత ఆగస్టు 16నే కాశ్మీర్ అంశాన్ని చైనా ఐరాస భద్రతా మండలిలో ప్రస్తావించేందుకు ప్రయత్నించింది. అయితే భారత మిత్ర దేశాలు దీనిపై బహిరంగ చర్చను గానీ, పబ్లిక్ స్టేట్ మెంట్ ను గానీ అనుమతించేందుకు నిరాకరించాయి. ఈ చర్చకు ఓటింగ్ అవసరం లేదు కూడా.. కాశ్మీర్ విషయమై ఇండియా ఇదివరకే సభ్య దేశాలకు, మిత్ర దేశాలకు తమ వైఖరిని స్పష్టం చేసింది. అసలు ఈ అంశంపై చర్చ జరగవలసిన అవసరమే లేదని పేర్కొంది. ఈ సందర్భంలో పాకిస్తాన్ ‘ విషం గక్కే ‘ ధోరణిని కూడా నిపుణులు గుర్తు చేస్తున్నారు. వాస్తవాధీన రేఖ పొడవునా అయిదు సెక్టార్లలో ఉన్న కంచెలను ఇండియా పాక్షికంగా తొలగించిందని ఆరోపిస్తూ పాక్ విదేశాంగ మంత్రి షా మహమ్మద్ ఖురేషీ ఇటీవలే ఐరాస భద్రతా మండలికి లేఖ రాశారు. తమ దేశాన్ని ‘ నామరూపాలు ‘ లేకుండా చేసేందుకు భారత ప్రభుత్వం యత్నిస్తోందని ఆయన అన్నారు. ఆయనకు చైనా కూడా వంత పాడింది. జమ్మూ కాశ్మీర్ ను రెండు కేంద్ర పాలిత ప్రాంతాలుగా చేస్తూ భారత ప్రభుత్వం తీసుకున్న నిర్ణయాన్ని చైనా వ్యతిరేకిస్తోంది. అందువల్లే ఈ అంశంపై చర్చ జరగాలని కోరుతోంది.