ఐపీఎల్ 2020: పంజాబ్ రేసులో నిలవాలంటే.. గెలవాల్సిందే!

ఐపీఎల్ 2020లో భాగంగా షార్జా వేదికగా రాయల్ ఛాలెంజర్స్ బెంగళూరు, కింగ్స్ ఎలెవన్ పంజాబ్ మధ్య రసవత్తరమైన పోరు జరగనుంది. ఈ మ్యాచ్ ఇవాళ రాత్రి 7.30 గంటలకు ప్రారంభం కానుంది.

Updated on: Oct 15, 2020 | 1:59 PM

ఐపీఎల్ 2020లో భాగంగా షార్జా వేదికగా రాయల్ ఛాలెంజర్స్ బెంగళూరు, కింగ్స్ ఎలెవన్ పంజాబ్ మధ్య రసవత్తరమైన పోరు జరగనుంది. ఈ మ్యాచ్ ఇవాళ రాత్రి 7.30 గంటలకు ప్రారంభం కానుంది. ఇప్పటిదాకా ఈ రెండు జట్లూ చెరో ఏడు మ్యాచ్‌లు ఆడగా.. బెంగళూరు ఐదు మ్యాచ్‌లు గెలిచి పాయింట్ల పట్టికలో మూడో స్థానం నిలవగా.. కేవలం ఒక్క మ్యాచ్‌లోనే విజయం సాధించి పంజాబ్ చివరి స్థానంలో నిలిచింది. ఇక రేసులో నిలవాలంటే పంజాబ్ జట్టు ఈ మ్యాచ్ ఖచ్చితంగా గెలవక తప్పదు. (RCB Vs KXIP Match 31st Predictions)

రాహుల్&కో ఇప్పటిదాకా అన్ని మ్యాచ్‌ల్లోనూ అద్భుతమైన పెర్ఫార్మన్స్‌లు ఇచ్చారు. కానీ వారి బ్యాడ్ లక్ వల్ల ఏదీ కలిసి రావట్లేదు. పంజాబ్ టీంకు రాహుల్, మయాంక్ అగర్వాల్ ఓపెనర్లు.. వీరిద్దరూ కూడా విధ్వంసకర బ్యాట్స్‌మెన్‌.. ఒక్కసారిగా క్రీజులో నిలదొక్కుకుంటే పంజాబ్‌కు గెలుపు ఖాయమేనని చెప్పాలి. అలాగే మిడిల్ ఆర్డర్‌లో నికోలస్ పూరన్ ప్రతీ మ్యాచ్‌లోనూ అదరగొడుతున్నాడు. ఈ మ్యాచ్‌కు క్రిస్ గేల్ కూడా అందుబాటులో ఉండటం పంజాబ్ బ్యాటింగ్ లైనప్‌కు మరింత బలాన్ని ఇస్తోంది. జోర్డాన్, షమీ, మురుగన్ అశ్విన్, రవి బిష్ణోయ్, అర్ష్‌దీప్‌లతో బౌలింగ్ లైనప్ కూడా బలంగానే ఉంది.

అటు బెంగళూరు విషయానికి వస్తే.. ఈ జట్టు అన్ని విభాగాల్లోనూ మెరుగ్గా కనిపిస్తోంది. ఆర్సీబీ బౌలర్లు ప్రతీ మ్యాచ్‌లోనూ అద్భుతంగా రాణిస్తున్నారు. అటు కెప్టెన్ విరాట్ కోహ్లీ ఫామ్‌లోకి రావడం.. పడిక్కల్, ఫించ్, డివిలియర్స్ అదరగొట్టడం బెంగళూరుకు కలిసొచ్చే అంశం. ఆల్‌రౌండర్‌గా క్రిస్ మోరిస్ తనవంతు పాత్రను పోషిస్తున్నాడు. రెండు బలమైన జట్ల మధ్య సాగే ఈరోజు మ్యాచ్‌లో ఎవరు విజయం సాధిస్తారో వేచి చూడాలి..