కరోనా వ్యాప్తికి మాస్కులతోనే రక్షణ… 70శాతం తగ్గించవచ్చంటున్న పరిశోధకులు..

కరోనా వ్యాప్తికి కళ్లెం వేయటంలో మాస్కుల ప్రాధాన్యాన్ని తాజా అధ్యయనమొకటి మరోసారి రుజువు చేసింది! కనీసం 70 శాతం మంది ప్రజలు సమర్థమైన సర్జికల్‌ మాస్కును స్థిరంగా ధరిస్తే కొవిడ్‌-19 మహమ్మారికి అడ్డుకట్ట వేయొచ్చని సింగపూర్‌ పరిశోధకులు నిర్వహించిన అధ్యయనంలో తేలింది.

కోవిడ్ -19 వ్యాప్తిని అరికట్టడానికి ఉపయోగించే మాస్క్‌ తయారీలో వాడే పదార్థాలు, దాని రూపకల్పన, పొడవు తదితర అంశాలు కూడా ముఖ్య పాత్ర పోషిస్తాయని పరిశోధకులు నొక్కి చెబుతున్నారు. ‘‘ఫిజిక్స్ ఆఫ్ ఫ్లూయిడ్స్’’ పేరిట ప్రచురితమైన జర్నల్‌లో వైద్య నిపుణులు ఈ మేరకు వివరాలు వెల్లడించారు. ఫేస్ మాస్క్‌లు, వాటి ఉపయోగం గురించి చేసిన పరిశోధనల ఆధారంగా.. మాస్క్‌ డిజైన్‌లలో కూడా పలు సమస్యలు ఉన్నాయని, వాటిలో మార్పు చేయగలిగితే సత్ఫలితాలు పొందవచ్చని పేర్కొన్నారు. ఫేస్ మాస్క్‌లు వైరస్‌ను ఫిల్టర్ చేయడం, దాన్ని నిరోధించే విధానం గురించి అధ్యయనం చేసిన నివేదికలను వెల్లడించారు. ఈ బృందంలో భారతీయ సంతతికి చెందిన ఒక శాస్త్రవేత్త కూడా ఉన్నారు.

అలాగే, తుమ్మినపుడు, దగ్గినపుడు, మాట్లాడినపుడు నోరు, ముక్కు ద్వారా విడుదలయ్యే తుంపర్లను అడ్డుకోవడంలో మాస్కు ప్రధానంగా పనిచేస్తోందని శాస్త్రవేత్తలు వెల్లడించారు. ఐదు మైక్రాన్ల కన్నా తక్కువ పరిమాణం ఉండే ప్రమాదకరమైన తుంపర్లను సర్జికల్‌ మాస్కు ఫిల్టర్‌ చేయగలదని గుర్తించారు. క్లాత్ తో తయారైన మాస్కులను నిరంతరంగా ధరించడం వల్ల కూడా వైరస్‌ వ్యాప్తిని తగ్గించొచ్చని అధ్యయనంలో పాలు పంచుకున్న భారత సంతతి శాస్త్రవేత్త సంజయ్‌ కుమార్‌ చెప్పారు. హైబ్రిడ్‌ పాలిమర్‌లతో తయారయ్యే మాస్కులు అత్యంత సమర్థంగా తుంపర్లను ఫిల్టర్‌ చేయగలవని గుర్తించినట్లు ఆయన తెలిపారు. శ్వాస తీసుకునేటపుడు, వదిలేటపుడు మాస్కు నిరోధకతలో సంబంధం ఉండొచ్చని, దీనిపై మరింత పరిశోధించాల్సి ఉందని రచయిత హియో ప్యూహ్ లీ చెప్పారు.