దీపక్ కొచార్ కి కరోనా వైరస్ పాజిటివ్, క్వారంటైన్ లో ‘ఈడీ’ !

ఐసీఐసీఐ-వీడియోకాన్ స్కామ్ కు సంబంధించి ప్రస్తుతం ఈడీ కస్టడీలో ఉన్న దీపక్ కొచార్ కి కరోనా వైరస్ పాజిటివ్ సోకింది. దీంతో ఈడీ సిబ్బంది అంతా తమకు తాము క్వారంటైన్ లోకి వెళ్లారు. వారితో బాటే దీపక్ లాయర్ కూడా ! మనీలాండరింగ్ కేసును విచారించే ప్రత్యేక కోర్టు దీపక్ కొచార్ ను ఈ నెల 19 వరకు ఈడీ కస్టడీకి పంపింది. ఐసీఐసీఐ బ్యాంకు మాజీ ఎండీ, సీఈఓ చందా కొచార్ భర్త అయిన దీపక్ కొచార్ ను ఈ నెల 7 న అరెస్టు చేశారు. వీడియోకాన్ గ్రూపునకు, తన ఆధ్వర్యంలోని నూపవర్ రెనివబుల్ సంస్థకు మధ్య నడిచిన పలు ఆర్ధిక లావాదేవీలపై ఈడీ అధికారులు అడిగిన ప్రశ్నలకు దీపక్ సరిగా సమాధానాలు ఇవ్వలేకపోయారు. ఈ సంస్థ 2010 లో వీడియోకాన్ గ్రూపు నుంచి 64 కోట్లను, మాట్రిక్స్ ఫెర్టిలైజర్స్ నుంచి 325 కోట్లను పెట్టుబడులుగా అందుకుంది. ‘చందా గారు’ ఐ సీ ఐ సీ ఐ బ్యాంకు ప్రధాన అధికారిగా ఉండగా ఈ సంస్థలకు బ్యాంకు రుణాలు ఇచ్ఛేముందు ఇవన్నీ జరిగాయి. ఈ యవ్వారం ‘నీకది..నాకది’ ప్రతిఫలం కింద సాగింది. ముడుపులు, అవకతవకలు షరా మామూలే ! దీంతో ఈడీ రంగంలోకి దిగి చందా గారి 80 కోట్ల విలువైన ఆస్తులను ఎటాచ్ చేయడం, పనిలో పనిగా ఆమె భర్తను అరెస్టు చేయడం కూడా జరిగింది.