Human Height Variations: ఉదయం పూట ఎత్తు పెరిగి.. సాయంత్రానికి తగ్గుతారా? ఈ వింత వెనుక ఉన్న అసలు సైన్స్ ఇదీ!
మనం ఉదయం నిద్రలేచినప్పుడు ఉండే ఎత్తు కంటే సాయంత్రం మన ఎత్తు కొద్దిగా తగ్గుతుంది. ఇది ఏదో భ్రమలా అనిపించినప్పటికీ నూటికి నూరు శాతం నిజం. మన శరీర నిర్మాణ శాస్త్రం, భూమి గురుత్వాకర్షణ శక్తి దీనికి ప్రధాన కారణాలు. ప్రభుత్వ ఉద్యోగ నియామకాలు లేదా వైద్య పరీక్షల కోసం ఎత్తు కొలవాలనుకునే వారు ఈ శాస్త్రీయ నియమాన్ని గుర్తుంచుకోవడం ఎంతో అవసరం.
రోజులో వేర్వేరు సమయాల్లో మీ ఎత్తు మారుతుందనే విషయాన్ని మీరు ఎప్పుడైనా గమనించారా? మీరు ఉదయం నిద్రలేచినప్పుడు రోజులోని ఇతర సమయాల కంటే మీ ఎత్తు కొద్దిగా ఎక్కువగా ఉంటుంది. కానీ సాయంత్రం సమీపించే కొద్దీ ఈ ఎత్తు కొద్దిగా తగ్గుతుందని సైన్స్ చెబుతోంది. ఈ వింత ప్రక్రియ వెనుక ఒక నిర్దిష్టమైన శాస్త్రీయ కారణం దాగి ఉంది. మన వెన్నెముక భూమి గురుత్వాకర్షణ శక్తే దీనికి ప్రధాన కారణం. మన శరీరంలో వెన్నెముక ఒక అద్భుతమైన నిర్మాణాన్ని కలిగి ఉండి రోజువారీ కదలికలను నియంత్రిస్తుంది.
వెన్నెముకలో ఉండే మృదులాస్థి డిస్క్లు
మన వెన్నెముకలో ఒకదానికొకటి లింక్ అయి అనేక చిన్న ఎముకలు ఉంటాయి. ఈ ఎముకల మధ్య భాగంలో ‘మృదులాస్థి డిస్క్’ అని పిలిచే సహజమైన, మెత్తటి కుషన్ లాంటి నిర్మాణాలు ఉంటాయి. ఈ డిస్క్లు ప్రధానంగా నీరు జెల్ లాంటి ద్రవంతో తయారై ఉంటాయి. ఇవి మన శరీరాన్ని ఆరోగ్యంగా ఉంచుతూ నడిచేటప్పుడు లేదా పరిగెత్తేటప్పుడు ఎముకలపై పడే ఒత్తిడిని గ్రహించి షాక్ నుండి రక్షించడానికి పనిచేస్తాయి.
పగటిపూట ఎత్తు తగ్గడానికి గల కారణాలు
రోజంతా నిలబడినప్పుడు, నడిచినప్పుడు, పరిగెత్తినప్పుడు లేదా కుర్చీలో కూర్చుని పని చేసినప్పుడు భూమి, గురుత్వాకర్షణ శక్తి మన శరీరాన్ని నిరంతరం కిందకు లాగుతుంది. దీనికి తోడు మన శరీర బరువు, నిలువు ఒత్తిడి కూడా వెన్నెముకపై పడుతుంది. ఈ ఒత్తిడి కారణంగా ఈ సున్నితమైన మృదులాస్థి డిస్క్లు రోజంతా సంకోచిస్తాయి వాటి లోపల ఉన్న ద్రవం క్రమంగా బయటకు వస్తుంది. ఫలితంగా డిస్క్లు కుంచించుకుపోయి సాయంత్రం సమయానికి మన ఎత్తు కొద్దిగా తగ్గుతుంది.
రాత్రి వేళల్లో పెరిగే ఎత్తు..
మనం రాత్రి పడుకున్నప్పుడు శరీరం పడకపై సమాంతర స్థితిలో ఉంటుంది. ఈ స్థితిలో వెన్నెముకపై గురుత్వాకర్షణ శక్తి శరీర బరువు, నిలువు, ఒత్తిడి పూర్తిగా తొలగిపోతాయి. రాత్రిపూట 7 నుండి 8 గంటల నిద్ర సమయంలో మన వెన్నెముక పూర్తి విశ్రాంతి తీసుకుంటుంది. ఈ సమయంలో మృదులాస్థి డిస్క్లు సాధారణ స్థితికి వస్తాయి. అంటే అవి చుట్టుపక్కల ఉన్న ద్రవాన్ని తిరిగి పీల్చుకుని, ఉబ్బి తమ అసలు స్థానానికి చేరుకుంటాయి. ఈ ప్రక్రియను శాస్త్రీయ పరిభాషలో డీకంప్రెషన్ అంటారు. అందుకే మనం ఉదయం నిద్రలేచినప్పుడు సాయంత్రం కంటే మన ఎత్తు కొద్దిగా ఎక్కువగా ఉంటుంది.
అంతరిక్షంలో వ్యోమగాముల ఎత్తు..
భూమిపై ఉండే గురుత్వాకర్షణ శక్తి అంతరిక్షంలో ఉండదు కాబట్టి అక్కడ వ్యోమగాముల వెన్నెముకపై ఎలాంటి ఒత్తిడి పడదు. ఫలితంగా అంతరిక్షంలో ఉండే వ్యోమగాముల ఎత్తు తాత్కాలికంగా దాదాపు 2 అంగుళాలు పెరుగుతుంది. అలాగే వయసు పెరిగే కొద్దీ ఈ వెన్నెముక డిస్కులు సహజంగానే శాశ్వతంగా ఎండిపోయి అరిగిపోవడం మొదలవుతాయి. దీనివల్ల వృద్ధాప్యంలో ఒక వ్యక్తి ఎత్తు సహజంగానే కొద్దిగా తగ్గుతుంది.