మంత్రి కుమారుడిని అడ్డుకున్న ‘లేడి సింగం’కు ట్రాన్స్ఫర్
కర్ఫ్యూ నిబంధనలను ఉల్లంఘించిన కారణంగా గుజరాత్‌లో ఆరోగ్య శాఖ మంత్రి కుమారుడు ప్రకాష్ కనాని, అతని ఇద్దరు స్నేహితులను మహిళ కానిస్టేబుల్ సునీతా యాదవ్ నిలదీసిన విషయం తెలిసిందే.
కర్ఫ్యూ నిబంధనలను ఉల్లంఘించిన కారణంగా గుజరాత్‌లో ఆరోగ్య శాఖ మంత్రి కుమారుడు ప్రకాష్ కనాని, అతని ఇద్దరు స్నేహితులను మహిళ కానిస్టేబుల్ సునీతా యాదవ్ నిలదీసిన విషయం తెలిసిందే. ఈ క్రమంలో ఆ మహిళా కానిస్టేబుల్‌కు ఫోన్ చేసిన ప్రకాష్ ఆమెతో వాగ్వాదానికి దిగాడు. ‘మాకు పవర్ ఉంది.. నేను తలుచుకుంటే మమ్మల్ని ఎక్కడ నిలబెట్టావో అదే ప్లేస్‌లో నిన్ను 365 రోజులూ నిల్చోబెడతా’ అని సునీతాకు వార్నింగ్ ఇచ్చాడు. ఆ బెదిరింపుకు భయపడని సునీతా.. ”365 రోజులు అక్కడ నిలబెడితే నిల్చోడానికి నేను నీకు బానిసను కాదు, నీ తండ్రికి సర్వెంట్‌ను కాదు” అని గట్టిగా చెప్పింది.
ఆ ఆడియో క్లిప్స్ కాస్త సోషల్ మీడియాలో వైరల్‌గా మారడంతో సునీతా యాదవ్‌పై సర్వత్రా ప్రశంసలు వ్యక్తమయ్యాయి. ఆమెకు మద్దతిస్తూ ఎంతో మంది నెటిజన్లు ట్వీట్లు వేశారు. ఈ నేపథ్యంలో విచారణ జరిపిన పోలీసు ఉన్నతాధికారులు మంత్రి కొడుకు సహా మరో ఇద్దరిని అరెస్ట్‌ చేశారు. ఆ తరువాత బెయిల్ తీసుకొని బయటకు వచ్చారు. ఇదిలా ఉంటే ఈ ఘటన తరువాత సునీతా యాదవ్‌ని పోలీస్ హెడ్‌క్వార్టర్స్‌కి ట్రాన్స్ఫర్ చేశారు. బ‌దిలీ అయిన సునీతా యాదవ్ అనారోగ్యంతో సెలవు పెట్టారు.
