మా అధినేత్రినే దూరం పెడతారా.. ట్రంప్‌తో విందుకు దూరంగా మన్మోహన్..మరికొందరు..!

అగ్రరాజ్యం అమెరికా అధ్యక్షుడు డోనాల్డ్ ట్రంప్‌తో విందుకు మాజీ ప్రధాని మన్మోహన్ సింగ్ దూరం ఉంటున్నట్లు సమాచారం. రెండు రోజుల పర్యటన నిమిత్తం.. డోనాల్డ్ ట్రంప్ సోమవారం భారత్‌కు చేరుకున్నారు. ఈ నేపథ్యంలో మంగళవారం రాత్రి రాష్ట్రపతి రామ్‌నాథ్ కోవింద్ మర్యాదపూర్వకంగా విందును ఇవ్వనున్నారు. ఈ కార్యక్రమానికి పలువురు ప్రముఖులను ఆహ్వానించారు. ఇందులో భాగంగా మాజీ ప్రధాని మన్మోహన్‌ సింగ్‌ సహా.. పలువురు కాంగ్రెస్‌ నేతలకు కూడా ఆహ్వానించారు. అయితే తొలుత ఈ విందుకు ఓకే చెప్పిన మన్మోహన్.. ఇప్పుడు వెళ్లట్లేదని తెలుస్తోంది. అలాగే రాజ్యసభ సభ్యులు గులాం నభీ ఆజాద్ కూడా.. ఈ విందుకు గైర్హాజరవుతున్నట్లు సమాచారం. కాగా.. ఈ విందుకు పార్టీ అధినేత్రి సోనియా గాంధీకి ఆహ్వానం రాకపోవడంతో.. అంసతృప్తి వ్యక్తం చేస్తూ విందుకు హాజరవ్వడం లేదని లోక్‌సభలో ప్రతిపక్ష నేత అధిర్‌ రంజన్‌ చౌదరీ ఇప్పటికే స్పష్టం చేశారు.