ఫేస్‌బుక్ కీచకుడు అరెస్ట్.. వీడో ఎర్రగులాబీ!

ఈ మధ్యకాలంలో ఫేస్‌బుక్‌లో నకిలీ అకౌంట్స్ ఎక్కువైపోయాయి. వాటి ద్వారా కొంతమంది కీచకులు అమ్మాయిలను లోబరుచుకుంటున్నారు. సరిగ్గా ఇలాంటి ఘటనే ఒకటి కేరళలో జరిగింది. ఫేస్‌బుక్‌లో మహిళలతో పరిచయం పెంచుకుని.. ఆ సాన్నిహిత్యంతో వారిని లైంగికంగా లోబరుచుకున్న ఓ ప్రబుద్దుడిని పోలీసులు అరెస్ట్ చేశారు. ఓ బాధితురాలు ఇచ్చిన ఫిర్యాదు మేరకు అతనిని అదుపులోకి తీసుకున్న పోలీసులు.. 50 మందికి పైగా మహిళలు ఈ మాయగాడి వలలో పడ్డారని తెలిసి నివ్వెరపోయారు.

అసలు వివరాల్లోకి వెళ్తే.. ఎట్టిమనూర్ సమీపంలోని ఆరిపరబుకు చెందిన ప్రదీష్ కుమార్(25) గత కొన్ని నెలలుగా వివాహితులతో ఫేస్‌బుక్‌లో పరిచయం పెంచుకునేవాడు. వారి ఫోన్ నెంబర్లు సంపాదించి.. పూర్తి వివరాలు తెలుసుకునేవాడు. అంతేకాదు వారి కుటుంబసమస్యలు తెలుసుకుని.. అమ్మాయిలా నకిలీ ఫేస్‌బుక్ ఖాతాలు తెరిచి ఆ మహిళల భర్తలతో చాటింగ్ చేసేవాడు. వాటిని స్క్రీన్ షాట్స్‌గా తీసి ఆ వివాహితలకే పంపి.. భార్యాభర్తల మధ్య విభేదాలు సృష్టించేవాడు. అలా మానసికంగా ఆ మహిళలను కృంగతీసి మరింత సన్నిహితంగా చాట్ చేసేవాడు. వారి ఫొటోస్, చాట్స్‌ను అసభ్యంగా మార్చి.. వాటితో వాళ్ళను బెదిరించి లైంగికంగా లోబరుచుకునేవాడు. ఇలా ఈ మాయగాడి ఉచ్చులో 50 మందికి పైగా బాధితులు ఉన్నట్లు పోలీసులు వెల్లడించారు.

అటు నిందుతుడు దగ్గర నుంచి ల్యాప్ టాప్‌ను స్వాధీనం చేసుకున్నామని.. అతని దగ్గర ఉన్న అసభ్య ఫోటోలను కూడా డిలీట్ చేశామన్నారు. ఒక్కో మహిళలకు ఒక్కో సీక్రెట్ కోడ్ ఏర్పాటు చేసి.. అది చెబితేనే అతనితో చాట్ చేసేలా ఏర్పాటు చేసుకున్నాడని పోలీసులు తెలిపారు.