నయనతార ఖర్చులు భరించలేమంటూ.. నిర్మాత షాకింగ్ కామెంట్స్!

దక్షిణాదిన అత్యధిక రెమ్యునరేషన్ తీసుకుంటోన్న టాప్‌ హీరోయిన్స్‌లలో ప్రముఖ నటి నయనతార ఒకరు. 2003లో చిత్ర సీమలోకి అడుగుపెట్టిన ఈ భామ.. ఇప్పటికీ సూపర్‌ స్టార్‌గానే రాణిస్తోంది. అలాగే లేడీ ఓరియెంటెడ్ సినిమాల్లో నటించి మెప్పించింది. దాంతో రెమ్యునరేషన్‌ కూడా భారీగానే పెంచేసింది నయన్. కాగా.. ఈ సందర్భంగా ఓ నిర్మాత నయన్ పారితోషికంపై షాకింగ్ కామెంట్స్ చేశారు.

‘సినిమా కోసం కాకుండా హీరోయిన్స్, హీరో ఖర్చుల కోసం నిర్మాత అదనంగా చాలా డబ్బు ఖర్చు చేయాల్సి ఉంటుందని నిర్మాత కే రాజన్ షాకింగ్ కామెంట్స్ చేశారు. ఇక నయనతార విషయంలో అయితే.. అసిస్టెంట్స్ జీతాలు కూడా భరించాల్సి వస్తుందని ఆయన చెప్పుకొచ్చారు. నయనతారతో పాటు ఆరు లేదా ఏడుగురు వ్యక్తులు నయనతారకు సహాయకులుగా పనిచేస్తూంటారు. వారందరికీ రోజూ రూ.7 నుంచి రూ.12 వేల వరకూ జీతం ఇవ్వాల్సి ఉంటుంది. ఆ సహాయకులందరి రోజు వారీ ఇచ్చే జీతం కలిపితే ఒక్క రోజులోనే దాదాపు 80 వేలు ఉంటుంది. వీటితో పాటు కారు డ్రైవర్, డీజిల్ ఖర్చులు’ కూడా నిర్మాతే భరించాలని ఆయన వ్యాఖ్యానించారు.

అలాగే ప్రతీ హీరో, హీరోయిన్లు, మిగతా సీనియర్ నటుల క్యారావాన్ ఖర్చులు కూడా చాలా ఎక్కువగా ఉంటాయి. నిజానికి ఇవన్నీ నిర్మాత భరించడం వల్లే సినిమా ఖర్చు పెరుగుతోందని రాజన్ అభిప్రాయపడ్డారు. ఇక పెద్ద సినిమాలకైతే ఒక్కోసారి 8 నుంచి 9 క్యారావాన్లు అవసరమవుతుంటాయని, వాటికి ఒక్కరోజు రూ.10 వేలు చెల్లించాల్సి వస్తుందని ఒక సినిమా పూర్తయ్యేలోపు క్యారావాన్ల కోసమే కోటి ఖర్చు చేయాల్సివస్తుందని కే రాజన్ పేర్కొన్నారు. ప్రస్తుతం ఈయన వ్యాఖ్యలు తీవ్ర దుమారాన్ని సృష్టిస్తున్నాయి.