Allu Arjun Arrest: అల్లు అర్జున్‌‌ అరెస్ట్.. పోలీస్ స్టేషన్‌కు చిరంజీవి…

సినీ నటుడు అల్లు అర్జున్‌ను  చిక్కడపల్లి పోలీసులు అరెస్ట్ చేశారు. సంధ్య థియేటర్ లో జరిగిన తొక్కిసలాట కేసులో ఆయన్ను అదుపులోకి తీసుకున్నారు.  డిసెంబర్‌ 4, రాత్రి 9గంటలకు హైదరాబాద్‌ సంధ్య థియేటర్‌కు పరిమితికి మించి ప్రేక్షకులు రావడంతో తొక్కిసలాట జరిగింది. గేట్ దగ్గరకు జనాలు చొచ్చుకురావడంతో అదుపు చేసేందుకు పోలీసులు లాఠీఛార్జ్‌ చేశారు. తొక్కిసలాటలో తీవ్రంగా గాయపడి రేవతి అనే మహిళ మృతి చెందింది. ఆమె కుమారుడు ఇంకా చికిత్స పొందుతున్నారు.  ఆ తర్వాత  ఈ ఘటనపై స్పందించారు అల్లు అర్జున్‌. రేవతి గారి ఫ్యామిలీకి అల్లు అర్జున్‌ సంతాపం తెలియజేశారు. తన తరఫున బాధిత కుటుంబానికి 25లక్షలు అందిస్తానని చెప్పారాయన.

అయితే అల్లు అర్జున్‌తో పాటు సంధ్య యాజమాన్యం అల్లు అర్జున్ వ్యక్తిగత భద్రత సిబ్బందిపై కేసు నమోదైంది. 105, 118(1)r/w3(5) BNS యాక్ట్ కింద కేసు నమోదైంది. తొక్కిసలాటకు థియేటర్ యాజమాన్యమే కారణమని పోలీసులు ఆరోపించారు. అల్లు అర్జున్‌ను కూడా నిందితుడిగా చేర్చారు పోలీసులు. ఈ కేసులో ఇప్పటికే సంధ్య థియేటర్‌ యాజమాన్యంపై కేసు నమోదు చేసి, ముగ్గుర్ని అరెస్టు చేశారు. ఈ కేసుతో తమకు సంబంధం లేదని, సంధ్య థియేటర్ యాజమాన్యం ఉన్నత న్యాయస్థానంలో పిటిషన్ దాఖలు చేసింది. అది బెనిఫిట్ షో కావడంతో థియేటర్‌తో సంబంధం లేకుండా ఎగ్జిబిటర్స్ ఆ షో ప్రదర్శించారని థియేటర్ యాజమాన్యం పిటిషన్‌లో పేర్కొంది.

ఆ తర్వాత హైకోర్టును ఆశ్రయించారు హీరో అల్లు అర్జున్‌. సంధ్య థియేటర్ ఘటనలో తనపై నమోదైన కేసును కొట్టేయాలని పిటీషన్‌ దాఖలు చేశారు. ప్రస్తుతం అల్లు అర్జున్‌ను చిక్కడపల్లి పోలీస్ స్టేషన్ నుంచి వైద్య పరీక్షల నిమిత్తం.. గాంధీ ఆస్పత్రికి తరలిస్తున్నారు. ఆ తర్వాత న్యాయమూర్తి ముందు హాజరు పర్చనున్నారు.

కాగా అల్లు అర్జున్ అరెస్ట్ గురించి తెలిసిన వెంటనే.. చిరంజీవి షాక్‌కు గురయ్యారు. విశ్వంభర షూటింగ్ క్యాన్సిల్ చేసుకుని.. వెంటనే పోలీస్ స్టేషన్‌కు బయలుదేరినట్లు తెలిసింది.

అల్లు అర్జున్‌పై BNS 118 (1), BNS 105 సెక్షన్ల కింద కేసులు నమోదయినట్లు సమాచారం.  105 సెక్షన్ కింద నాన్‌బెయిలబుల్ కేసు.   నేరం రుజువైతే 105 సెక్షన్ కింద 5 నుంచి పదేళ్లు జైలుశిక్షపడే అవకాశం ఉంది.  BNS 118 (1) కింద ఏడాది నుంచి పదేళ్ల పాటు జైలు శిక్ష పడే చాన్స్ ఉన్నట్లు న్యాయ నిపుణులు చెబుతున్నారు.  సెక్షన్‌ 105 ప్రకారం ఒక వ్యక్తి మరణానికి పరోక్షంగా కారణమైతే..  5 నుంచి 10 ఏళ్ల జైలుశిక్ష పడే అవకాశం ఉంది.  118(1) కింద ఉద్దేశపూర్వకంగా వ్యక్తిని గాయపరిస్తే 3 ఏళ్ల జైలుశిక్ష పడుతుంది.

మరిన్ని సినిమా వార్తల కోసం ఇక్కడ క్లిక్ చేయండి