Puneeth Rajkumar: అక్కడ నా చిన్న తమ్ముడి ఫొటోలను చూడలేకపోతున్నా.. శివరాజ్‌కుమార్‌ భావోద్వేగం..

కన్నడ పవర్‌ స్టార్‌ పునీత్‌ రాజ్‌కుమార్‌ మనల్ని విడిచిపోయి నెల రోజులు గడిచిపోయాయి. అయినా ఇప్పటికీ ఆయన మరణాన్ని చాలామంది జీర్ణించుకోలేకపోతున్నారు..

Updated on: Nov 28, 2021 | 7:10 PM

కన్నడ పవర్‌ స్టార్‌ పునీత్‌ రాజ్‌కుమార్‌ మనల్ని విడిచిపోయి నెల రోజులు గడిచిపోయాయి. అయినా ఇప్పటికీ ఆయన మరణాన్ని చాలామంది జీర్ణించుకోలేకపోతున్నారు. పునీత్‌ మన మధ్యలేడన్న నిజాన్ని ఆయన కుటుంబ సభ్యులతో పాటు అభిమానులు కూడా నమ్మలేకపోతున్నారు. కాగా పునీత్‌ సోదరుడు పునీత్ రాజ్‌కుమార్‌ తాజాగా అనాథ, ఒంటరి మహిళల పునరావాస కేంద్రం శక్తిధామను సందర్శించారు. ఈ సందర్భంగా తన చిన్న తమ్ముడితో ఉన్న అనుబంధాన్ని మరోసారి గుర్తుకు తెచ్చుకున్నారు. తన సోదరుడు మరణవార్తను ఇప్పటికీ నమ్మలేకపోతున్నానంటూ కన్నీటి పర్యంతమయ్యాడు. తాను జీవించి ఉన్నంతవరకూ పునీత్‌ కుటుంబానికి సాయం చేస్తూనే ఉంటానని భరోసా ఇచ్చాడు.

అది చాలా అబద్ధం.. ‘చాలామంది లాగే చిన్న తమ్ముడి మరణాన్ని ఇప్పటికీ నేనింకా నమ్మలేకపోతున్నాను. అప్పూ నా పక్కనే ఉన్నట్టు అనిపిస్తోంది. ‘శివన్న’ అని ప్రేమగా పిలుస్తున్నట్టు వినిపిస్తోంది. ఈ నెల రోజులు ఎలా గడిచిపోయాయో కూడా నాకు అర్థం కావడం లేదు. అందుకే ఈ విషాదం నుంచి బయట పడడానికి మళ్లీ సినిమాలపై దృష్టి పెడుతున్నాను. కానీ ఎక్కడికి వెళ్లినా పూల దండలతో కూడిన పునీత్‌ ఫొటోలే కనిపిస్తున్నాయి. వాటిని చూసిన ప్రతిసారీ నాకు కన్నీళ్లు ఉబికి వస్తున్నాయి. అందుకే ఆ ఫొటోలను చూడకుండా ఉండటానికి ప్రయత్నిస్తున్నాను. ఈ భూమ్మీద అందరికీ మరణం అనివార్యమని తెలుసు. ఎప్పుడో ఒకసారి నా ఫొటోలు కూడా అలాగే పెడతారని కూడా తెలుసు. అయితే అప్పుడే మా చిన్న తమ్ముడి ఫొటోలు అక్కడ ఉంచడం నేను చూడలేకపోతున్నాను. సమయం అన్నిటినీ మర్చిపోయేలా చేస్తుందంటారు. కానీ అది చాలా అబద్ధం’ అని శివరాజ్‌కుమార్‌ భావోద్వేగానికి గురయ్యారు.