Nithya Menen: ప్రభాస్ ఎవరు అని అడిగినందుకు.. ఆ తర్వాత…

నటి నిత్యా మీనన్ తన సినీ ప్రస్థానం, వ్యక్తిగత అనుభవాలు, ముఖ్యంగా మీడియా పట్ల ఆమెకున్న అభిప్రాయాలపై ఓ ఇంటర్వ్యూలో నిర్మొహమాటంగా మాట్లాడారు. ఈ సందర్భంగా ప్రభాస్ ఎవరు? అనే వివాదాస్పద వ్యాఖ్య గురించి ఆమె వివరించారు. నిత్యా మీనన్ మాట్లాడుతూ, తాను సాధారణంగా సినిమాలు ఎక్కువగా చూడనని, తెలుగు చిత్ర పరిశ్రమ ఆమెకు అప్పటికి కొత్త కావడంతో ప్రభాస్ గురించి తెలియదని స్పష్టం చేశారు. తనకు ఎవరో పేరు చెప్పినప్పుడు, అమాయకంగా “ఎవరు?” అని మాత్రమే అడిగానని, ప్రభాస్ ఎవరు? అని తాను ఎప్పుడూ అనలేదని, ఇదంతా మీడియా సృష్టించిందని ఆమె వివరించారు. మీడియా కావాలనే తన వ్యాఖ్యలను వక్రీకరించి, ఒక సంచలన వార్తగా మార్చిందని, ఇది తనను ఎంతో బాధించిందని నిత్యా మీనన్ పేర్కొన్నారు. “ఆ ఘటన నన్ను మానసికంగా చాలా దెబ్బతీసింది. నేను మోసపోయినట్లు, నన్ను వెన్నుపోటు పొడిచినట్లు అనిపించింది. అంతకుముందు నేను మీడియా ముందు చాలా ఓపెన్‌గా, సరదాగా మాట్లాడేదాన్ని. కానీ ఆ తర్వాత నేను నా నిజాయితీని అందరి ముందు ప్రదర్శించడం మానేశాను. నన్ను అర్థం చేసుకునే వారికి మాత్రమే నేను నిజాయితీగా ఉంటాను” అని నిత్యా మీనన్ అన్నారు. నటీనటులను కేవలం ప్రచారం కోసమో, గాసిప్‌ల కోసమో ఉపయోగించుకునే వస్తువులుగా చూడకుండా, వారు కూడా సాధారణ మనుషులని, వారికి మనసు ఉంటుందని మీడియా గ్రహించాలని ఆమె కోరారు. “నటీనటులు అంటే ఏదో గ్రహాంతరవాసులని, ప్లాస్టిక్ బొమ్మలని కాదు. మాకు కూడా బాధలు, భావోద్వేగాలు ఉంటాయి. మీరు నిజాలు తెలుసుకోకుండా రాసే ప్రతి మాట మమ్మల్ని బాధిస్తుంది. ఒక మనిషి హృదయాన్ని గాయపరిస్తే మీకు ఒరిగేదేమీ ఉండదు” అని నిత్యా మీనన్ తీవ్ర ఆవేదనతో తెలిపారు.

నాలుగు భాషల్లో (మలయాళం, తమిళ్, కన్నడ, తెలుగు) పనిచేసిన నిత్యా మీనన్, ఇతర పరిశ్రమలతో పోలిస్తే తెలుగు మీడియాలో మాత్రమే తాను ఎక్కువగా ఇంటరాక్ట్ అవుతానని పేర్కొన్నారు. దీనికి కారణం తెలుగు ప్రేక్షకుల పట్ల తనకున్న అభిమానమేనని ఆమె వివరించారు. “తెలుగు ప్రజలు నన్ను ఎంతగానో ప్రేమించారు. నాకు అవార్డులు వచ్చినప్పుడు కూడా అది వారి ఓట్ల ద్వారానే వచ్చింది. గుండె జారి గల్లంతయ్యిందే సినిమాకు అవార్డు అందుకునేందుకు నేను వెళ్ళాను. మామూలుగా నేను అవార్డుల కార్యక్రమాలకు వెళ్ళను. కానీ వారి ప్రేమ, అభిమానం కోసమే నేను వెళ్ళాను. ఇక్కడి ప్రేక్షకులతో నాకు ఎంతో అనుబంధం ఉంది. అందుకే నేను మీడియాకు అందుబాటులో ఉండి, వారికి మరింత దగ్గరవ్వాలని కోరుకుంటాను. నా అభిమానులు నిత్యా ఎందుకు రావడం లేదు, ఎందుకు మాట్లాడటం లేదు అని అడుగుతుంటారు. అందుకే అప్పుడప్పుడు వచ్చి మాట్లాడతాను” అని ఆమె తెలిపారు. ఈ సంభాషణ ద్వారా నిత్యా మీనన్, మీడియా ప్రముఖుల పట్ల చూపించే తీరు, దాని వల్ల వారు ఎదుర్కొనే మానసిక వేదనను స్పష్టంగా వివరించారు. అదే సమయంలో, తెలుగు ప్రేక్షకుల పట్ల తనకున్న ప్రగాఢమైన గౌరవాన్ని, ప్రేమను తెలియజేశారు.

చేతులారా చేసుకున్నా, పండు ప్రేమించిన అమ్మాయి ఎలా చనిపోయిందంటే..