Allu Arjun: బన్నీ కోసం స్పెషల్ టీమ్.. ఎందుకంటే..!

అల వైకుంఠపురములో చిత్రంతో ఈ ఏడాది మంచి విజయాన్ని ఖాతాలో వేసుకున్నారు స్టైలిష్ స్టార్ అల్లు అర్జున్. ప్రస్తుతం బన్నీ, సుకుమార్ దర్శకత్వంలో మూడోసారి నటించేందుకు సిద్ధమవుతున్నారు. ఎర్రచందనం స్మగ్లింగ్ నేపథ్యంలో ఈ సినిమా తెరకెక్కనుండగా.. మార్చి నుంచి ఈ చిత్ర షూటింగ్‌లో బన్నీ పాల్గొనబోతున్నారు. ఆ లోపు మిగిలిన వారిపై సన్నివేశాలను తెరకెక్కిస్తున్నారు సుకుమార్.

కాగా తన ప్రతి చిత్రంలో హీరోలను వైవిధ్యంగా చూపించే సుకుమార్.. ఈ మూవీలో బన్నీని ఇంతవరకు చూడని అవతారంలో చూపించబోతున్నారట. గుబురు గడ్డంతో బన్నీ కనిపించబోతున్నట్లు టాక్. ఇక బన్నీ లుక్‌ కోసం ముంబయి నుంచి ఓ టీమ్ హైదరాబాద్‌కు వచ్చిందట. ఆ టీమ్ బన్నీకి లుక్‌ మొదలుకొని కాస్ట్యూమ్స్, హెయిర్‌ స్టైల్ ఇలా అన్నీ డిజైన్ చేయనుందట. ఈ మేరకు ఇప్పటికే ఆ టీమ్ కొన్ని డిజైన్లను కూడా చేసుకొని సిద్ధంగా ఉండగా.. వాటిలో సుకుమార్ ఒక లుక్‌ను ఫైనల్ చేయనున్నారట.

ఇదిలా ఉంటే ఈ మూవీలో బన్నీ చిత్తూరు యాసలో మాట్లాడబోతుండగా.. అందుకోసం ప్రత్యేక శిక్షణ కూడా తీసుకుంటున్నట్లు సమాచారం. ఇక ఈ మూవీలో బన్నీ సరసన రష్మిక నటిస్తుండగా.. కోలీవుడ్ నటుడు విజయ్ సేతుపతి విలన్‌గా కనిపించే అవకాశం ఉందని సమాచారం. మైత్రీ మూవీ మేకర్స్ నిర్మిస్తోన్న ఈ మూవీకి దేవీ శ్రీ ప్రసాద్ సంగీతం అందిస్తుండగా.. వచ్చే ఏడాదిన ప్రేక్షకుల ముందుకు రానుంది.

Read This Story Also: అల్లు అరవింద్, బన్నీల మధ్య రెమ్యూనరేషన్ సీక్రెట్స్..!