Breaking News
  • నల్గొండ: చండూరు డాన్‌బాస్కో కాలేజీలో విద్యార్థి ఆత్మహత్య. ఉరివేసుకొని ఆత్మహత్య చేసుకున్న ఫస్టియర్‌ విద్యార్థి ప్రకాష్‌. ప్రకాష్‌ ఆత్మహత్యకు ప్రేమ వ్యవహారమే కారణమని అనుమానం. ప్రకాష్‌ స్వస్థలం గుంటూరు జిల్లా .
  • ప.గో: సంజీవయ్య నగర్‌లో కొండచిలువ కలకలం. నివాసాల మధ్యకు వచ్చిన 8 అడుగుల కొండచిలువ. భయబ్రాంతులకు గురైన స్థానికులు కొండచిలువను కొట్టి చంపిన స్థానికులు.
  • ప.గో: పెనుమంట్ర మండలం మార్టేరులో కిసాన్‌ మేళా. కిసాన్‌ మేళాలో పాల్గొన్న వ్యవసాయ మంత్రి కన్నబాబు. మాది రైతు పక్షపాత ప్రభుత్వం-మంత్రి కన్నబాబు. 44 లక్షల రైతు కుటుంబాలకు రైతుభరోసా వర్తింపు. రూ.3లక్షల రుణం తీసుకున్న రైతులకు వడ్డీ లేదు-కన్నబాబు. చిరుధాన్యాలు పండించే రైతులను ప్రోత్సహించేందుకు. త్వరలోనే విధివిధానాలు ప్రకటిస్తాం-మంత్రి కన్నబాబు
  • సంగారెడ్డి: జిల్లాలో పలు అభివృద్ధి పనులకు హరీష్‌రావు శంకుస్థాపన. జోగిపేట, ఆందోల్‌లో రూ.10కోట్ల పనులకు శంకుస్థాపన చేసిన హరీష్‌. మున్సిపాల్టీ ఎన్నికల్లో టీఆర్ఎస్‌ విజయం ఖాయం-మంత్రి హరీష్‌రావు. కాళేశ్వరం, మల్లన్న సాగర్‌ నీళ్లతో సింగూర్‌ను నింపుతాం-హరీష్‌. సాగుకోసం సింగూర్‌ నీరు మెదక్ జిల్లాకు దక్కేలా ప్రణాళికలు రచిస్తాం. సింగూర్‌లో నీళ్లు లేకపోవడంతో ప్రత్యామ్నాయ ఏర్పాటు చేస్తాం. అదనంగా నిధులు ఇవ్వాలని సీఎం అధికారులను ఆదేశించారు-హరీష్‌రావు.
  • తెలంగాణ భవన్‌లో ముగిసిన టీఆర్‌ఎస్‌పీపీ సమావేశం కాళేశ్వరం ప్రాజెక్ట్‌కు జాతీయహోదాపై పోరాడుతాం-ఎంపీ నామా. రాష్ట్రంలో అన్ని ప్రాజెక్ట్‌లకు నిధులు కోరుతాం-ఎంపీ నామా. కాళేశ్వరంపై సుప్రీంకోర్టులో ఏపీ అఫిడవిట్‌ దాఖలు చేయడంపై సీఎం కేసీఆర్‌ స్పందించారు-ఎంపీ నామా నాగేశ్వరరావు. బయ్యారం స్టీల్‌ప్లాంట్‌తో పాటు 30 అంశాలపై చర్చించాం . హామీల సాధన కోసం కేంద్రంపై ఒత్తిడి తెస్తాం-నామా నాగేశ్వరరావు. మిషన్‌ భగీరథ పథకానికి కేంద్రాన్ని నిధులు కోరుతాం-ఎంపీ నామా.
  • హైదరాబాద్‌: టీఆర్‌ఎస్‌ ఎంపీలకు కేటీఆర్‌ దిశానిర్దేశం. పార్లమెంట్ సమావేశాల్లో విభజన హామీలు పెండింగ్‌ సమస్యలను లేవనెత్తాలని కేటీఆర్‌ ఆదేశం. బడ్జెట్‌లో తెలంగాణకు దక్కాల్సిన అంశాలు, ప్రాజెక్టులు నిధులపై ఇప్పటి నుంచే పనిచేయాలని ఎంపీలకు సూచన. గణాంకాలతో ఎంపీలకు సమగ్ర సమాచారం అందించాలన్న కేటీఆర్‌. దేశ రాజధానిలో అన్ని హంగులతో పార్టీ కార్యాలయం నిర్మిస్తాం. పార్టీ ఆఫీస్‌ నిర్మాణ ప్రక్రియను వేగవంతం చేస్తామన్న కేటీఆర్‌.
  • తిరుమలలో పెరిగిన భక్తుల రద్దీ శ్రీవారి ఉచిత దర్శనానికి 12 గంటల సమయం ఈరోజు శ్రీవారి హుండీ ఆదాయం రూ.2.88కోట్లు

సమ్మెలపై ఉక్కుపాదం మోపితే..?.. గత చరిత్ర ఏం చెబుతోంది..?

ప్రభుత్వ సంస్థల్లో పనిచేస్తున్న కార్మికులు.. సమ్మె సైరన్ మోగిస్తున్నాం అని అంటే చాలు. ఈ వార్త విన్న మరుక్షణం ప్రభుత్వాలు ఉలిక్కిపడుతాయి. ఎందుకంటే ఈ పదానికి ఉన్న పవర్ అలాంటిది. ప్రభుత్వ, ప్రైవేట్ సంస్థల్లో పనిచేసే కార్మికులు.. వారి వారి న్యాయబద్దమైన డిమాండ్లను పొందేందుకు సమ్మెకు పిలుపునిస్తారు. అయితే వారి డిమాండ్లను ప్రభుత్వం పట్టించుకోనప్పుడు సమ్మెకు దిగుతారు. అయితే కొన్ని సందర్భాల్లో సమ్మె జరగకుండా ప్రభుత్వాలు వారిని శాంతింపజేస్తే.. మరి కొన్ని సందర్భాల్లో అణచివేసే ఘటనలు కూడా ఉంటాయి. అయితే ఈ సమ్మెలు చేసిన కాలంలో కార్మికుడు.. జీతం నష్టపోయి, అనుకున్నవి సాధించలేక ఓడిపోవచ్చు. కానీ అంతమాత్రాన ప్రభుత్వాలది గెలుపు కాదు.. కార్మికులది ఓటమి కాదు. అయితే ఈ సమ్మె ప్రభావం తర్వాత జరిగే ఎన్నికల్లో ఆ ప్రభుత్వంపై తప్పకుండా పడుతుంది. ఇది ప్రపంచంలో అనేక దేశాల్లో రిపీట్ అయ్యింది. అయితే మన భారత దేశ చరిత్రలో కూడా ఇలాంటి సమ్మె ఎఫెక్ట్‌లతో ప్రభుత్వాలు కుప్పకూలాయి.

అందులో ముఖ్యంగా 1974లో జరిగిన రైల్వే సమ్మె.. ఇది దేశ చరిత్రలోనే అతిపెద్ద సమ్మెగా చెబుతారు. అప్పట్లో జార్జి ఫెర్నాండెజ్​ నాయకత్వంలో 17 లక్షలమంది కార్మికులు, ఉద్యోగులు సమ్మెకు దిగారు. దాదాపు ఇరవై రోజులపాటు కొనసాగిన సమ్మె​ని అప్పటి ఇందిరాగాంధీ ప్రభుత్వం ఉక్కుపాదంతో అణచి వేసింది. దీని ప్రభావం ఆ తర్వాత జరిగిన ఎన్నికల్లో స్పష్టంగా కనిపించింది. సమ్మె ముగిసిన ముడేళ్ల1977లో జరిగిన ఎన్నికల్లో ఇందిర ప్రభుత్వం కుప్పకూలింది.

ఇక మరో సమ్మె ఎఫెక్ట్‌ను మర్రిచెన్నారెడ్డి చవిచూశారు. 1978లో మర్రి చెన్నారెడ్డి మొదటిసారి సీఎం అయ్యారు. అయితే సీఎం పీఠం అధిష్టించిన కొద్ది రోజులకే వైద్యులు సమ్మెకు దిగారు. తమ డిమాండ్లను పరిష్కరించాలంటూ అసిస్టెంట్​ సివిల్​సర్జన్లు, జూనియర్​ డాక్టర్లు నిరసన బాట పట్టారు. వారి డిమాండ్లను పట్టించుకోకుండా.. మర్రి చెన్నారెడ్డి సమ్మెను అణచివేశారు.దాని పర్యవసానమే.. ఆ తర్వాత రెండేళ్లకే జరిగిన(1980) ఎన్నికల్లో ఆయన సీఎం కుర్చీ వదులుకోవలసి వచ్చింది.

అంతేకాదు ఎన్టీఆర్ కూడా సమ్మె రుచిని చవిచూశారు. 1985 ఎన్నికల్లో రెండోసారి సీఎం అయ్యారు. సంవత్సరం గడిచిన తర్వాత 1986 నవంబర్​లో ఉద్యోగ, ఉపాధ్యాయ​, కార్మిక పోరాట సమితి సమ్మెకు పిలుపునిచ్చింది. ఏకంగా 53 రోజుల పాటు రాష్ట్రం స్తంభించింది. అయితే చివరకు ఉద్యోగులే తలవంచారు. కానీ ఆ తర్వాత 1989లో జరిగిన ఎన్నికల్లో ఘోర పరాభవాన్ని ఎన్టీఆర్ చూడాల్సి వచ్చింది.

ఇక 2002లో తమిళనాడు సీఎంగా జయలలిత ప్రమాణ స్వీకారం చేశారు. ఆ వెంటనే ఉద్యోగులు, టీచర్లపై మొండిగా వ్యవహరించారు. దీంతో 2003లో దాదాపు 10 లక్షలకు పైగా సిబ్బంది సమ్మెకు దిగారు. అయితే సమ్మెకు దిగిన వారిపై  జయ ప్రభుత్వం ఎస్మా ఆర్డినెన్స్​ ప్రయోగించి.. లక్షా 76 వేల మందిని డిస్మిస్ చేశారు. ఆ తర్వాత సుప్రీం చొరవతో వాళ్లను మళ్లీ విధుల్లోకి తీసుకున్నారు. కానీ, ఆ తర్వాత జరిగిన 2006 ఎన్నికల్లో జయలలిత ఓటమిని చవిచూశారు.

అయితే తాజాగా తెలంగాణలో ఆర్టీసీ కార్మిక సంఘాలు సమ్మెకు దిగాయి. దీంతో రాష్ట్రంలో ప్రజా రవాణా వ్వవస్థ ఇబ్బందుల్లో పడింది. అయితే అధికార టీఆర్ఎస్ ప్రభుత్వం కార్మికులతో చర్చలు జరిపేది లేదంటూ తెగేసి చెప్పింది. అంతేకాదు.. గడువులోగా విధుల్లోకి చేరని వారు సెల్ఫ్ డిస్మిస్‌ అయినట్లే నని ప్రకటించింది. అయితే ప్రభుత్వం సమ్మెలో పాల్గొన్న వారిని తొలగిస్తున్నట్లు పరోక్షంగా తేల్చి చెప్పింది. వారి ఉద్యోగాలను వారే వదులుకున్నారని.. వారి స్థానంలో కొత్త వారిని నియమించేందుకు సిద్ధమైనట్లు తెలపింది. అయితే గత చరిత్రను బట్టి చూస్తే.. కార్మికులు చేపట్టిన సమ్మెతో ప్రజల్లో ప్రభుత్వంపై వ్యతిరేకత ఏర్పడేది. కానీ ప్రస్తుతం తెలంగాణలో జరుగుతున్న సమ్మె తీరు చరిత్రకు విరుద్ధంగా కనిపిస్తున్నట్లు పలువురు విశ్లేషకులు అభిప్రాయపడుతున్నారు. దీనికి కారణం.. దసరా పండుగ సందర్భంగా సమ్మెకు దిగడంతో.. ప్రజల నుంచి మిశ్రమ స్పందన వస్తోంది. ఆర్టీసీ కార్మికులు చేపడుతున్న సమ్మెకు ప్రజల నుంచి పూర్తి స్థాయి మద్దతు రావడం లేదన్న అభిప్రాయం వ్యక్తమవుతోంది. అయితే విపక్షాలు మాత్రం సమ్మెకు మద్దతు తెల్పుతున్నా.. సహచర కార్మిక సంఘాలు పూర్తి స్థాయిలో రంగంలోకి దిగి మద్దతు ప్రకటించడం లేదు. ఇదే అధికార టీఆర్ఎస్ పార్టీకి ప్లస్ అవుతోంది. ప్రభుత్వ తీరును కొందరు ప్రజలు కూడా సమర్థిస్తుండటంతో.. సమ్మె ప్రభావం అధికార టీఆర్ఎస్‌పై ఎక్కువగా పడటం లేదు. అయితే రాబోయే 2023 ఎన్నికల వరకు ఈ సమస్య పూర్తిగా సమసిపోతుందన్న అభిప్రాయం వ్యక్తమవుతోంది. ఈ నేపథ్యంలో చరిత్రలో జరిగిన ఘటనలు తెలంగాణలో పునరావృతం కాదనే అభిప్రాయం వ్యక్తమవుతోంది.