డ్యాన్సర్ను చేస్తామంటూ రూ.5 లక్షలకు టోపీ
సినిమాలో డ్యాన్సర్ అవకాశం ఇప్పిస్తామని చెప్పి ఆ యువతి నుంచి రూ.5 లక్షలు వసూలు చేసిన ఘరానా మోసగాళ్ల ఉదంతం తాజాగా భయటపడింది...
“రంగుల ప్రపంచం… కలల ప్రపంచం.. శ్రీదేవిలా ఉన్నావ్.. జయసుధలా నటిస్తున్నావ్…” అంటుంటే హీరోయిన్ అయిపోదామని తెగ ఆరాటపడేవారు చాలా మంది ఉంటారు. ఇలాంటివారిని నిండా ముంచేందకు గుంటనక్కలు కూడా కాచుకు కూర్చుంటాయి. ఇలాంటి ముఠాకు చిక్కింది విశాఖకు చెందిన ఓ యువతి.
సినిమాలో డ్యాన్సర్ అవకాశం ఇప్పిస్తామని చెప్పి ఆ యువతి నుంచి రూ.5 లక్షలు వసూలు చేసిన ఘరానా మోసగాళ్ల ఉదంతం తాజాగా భయటపడింది. తాను మోసపోయానని గుర్తించిన బాధితురాలు కంచరపాలెం పోలీస్ స్టేషన్ తనిఖీకి వచ్చిన ఏసీపీ స్వరూపారాణికి ఫిర్యాదు చేసింది.
మురళీనగర్ ఎన్జీజీఓస్ కాలనీకి చెందిన బత్తుల ప్రభావతికి సినిమాల్లో నటించాలని… తాను అద్భుతమైన డ్యాన్సర్ కావాలని కోరిక. ప్రభావతి వీక్ నెస్ ను గమనించిన బొమ్మిడి గీతాప్రసాద్, సత్యనారాయణ, షరీఫ్లు ఆమెను తమ ముగ్గులోకి దింపారు. తమకు హైదరాబాద్ లోని సినిమా ప్రముఖులతో పరిచయాలు ఉన్నాయంటూ నమ్మించారు. ఐటమ్సాంగ్లో డ్యాన్స్ చేసే అవకాశం ఇప్పిస్తామని చెప్పారు.
అంతేకాదు.. ఒక్క ఐటమ్సాంగ్లో చిందేస్తే రూ.10 లక్షలు ఇస్తారంటూ మోసానికి తెరలేరుపారు. అయితే అందులో రూ.5 లక్షలు తమకు ముందే ఇవ్వాలని ఒప్పందం చేసుకున్నారు. ఇదంతా నిజమని నమ్మిన ప్రభావతి రూ.5 లక్షలు ఆ మూడు గుంటనక్కలకు ముట్టజెప్పింది. డబ్బులు దండుకున్న ఆ ముఠా కనిపించకుండా పోయింది. దీంతో మోసపోయానని గుర్తించి కంచరపాలెం పోలీసులకు ఫిర్యాదు చేసింది. విశాఖ వెస్ట్జోన్ సబ్డివిజన్ ఏసీపీ జి.స్వరూపారాణితో తన గోడు వినిపించుకుంది. దీనిపై స్పందించిన ఏసీపీ తగిన న్యాయం చేస్తానని హామీ ఇచ్చారు.