యువ జర్నలిస్టు మనోజ్ పేరిట ‘గాంధీ’లో ప్రత్యేక వార్డు..వారికి ఇక్క‌డే చికిత్స
కరోనా బారిన పడిన జర్నలిస్టులకు ఇక నుంచి గాంధీ ఆస్ప‌త్రిలో ప్రత్యేక వార్డులో చికిత్స అందించనున్నారు. ఇటీవల కోవిడ్‌తో మరణించిన జర్నలిస్ట్ మనోజ్ పేరుతో ఆస్ప‌త్రిలో ప్రత్యేక వార్డును ఏర్పాటు చేశారు.
తెలంగాణ‌లో కరోనా ఉధృతి కొన‌సాగుతోంది. లాక్‌డౌన్ టైమ్‌లో కరోనా వారియ‌ర్స్ కేట‌గిరిలో ఉన్న‌డాక్టర్లు, పారామెడికల్ సిబ్బంది, పోలీస్‌, శానిటేషన్ వర్కర్స్‌తో పాటు జ‌ర్న‌లిస్టుల‌పైనా కరోనా పంజా విసురుతోంది. ఎన్ని జాగ్రత్తలు తీసుకున్నా కొందరు జర్నలిస్టులు కరోనా బారినపడ్డారు. రెడ్ జోన్, గ్రీన్ జోన్, కంటైన్మెంట్ జోన్లు, ఆసుపత్రులన్నింటా కవరేజీలో భాగంగా కలిసి తిరగటంతో వైర‌స్ బారిన పడ్డారు. ఇప్పటి వరకు దాదాపు 20 మంది జర్నలిస్టులకు కరోనా సోకినట్లు సమాచారం. ఇందులో కొందరు గాంధీ ఆస్ప‌త్రిలో చేరి చికిత్స పొందుతుండ‌గా, ..మిగిలిన వారు హోంక్వారెంటైన్‌ అయ్యారు. ఈ క్ర‌మంలో కోవిడ్ సోకిన జ‌ర్న‌లిస్టుల కోసం గాంధీ ఆస్ప‌త్రిలో ప్రత్యేక వార్డును అందుబాటులోకి తెచ్చారు.
కరోనా బారిన పడిన జర్నలిస్టులకు ఇక నుంచి గాంధీ ఆస్ప‌త్రిలో ప్రత్యేక వార్డులో చికిత్స అందించనున్నారు. ఇటీవల కోవిడ్‌తో మరణించిన యువ జర్నలిస్ట్ మనోజ్ పేరుతో ఆస్ప‌త్రిలో ఆరో అంతస్థులో ప్రత్యేక వార్డును ఏర్పాటు చేశారు. స‌రైన వైద్యం అందకపోవడం వల్లే మనోజ్ మరణించడానే ఆరోపణల నేప‌థ్యంలో ప్ర‌భుత్వ తీరు పట్ల మీడియా ఉద్యోగుల నుంచి తీవ్ర విమర్శలు వెల్లువెత్తాయి. ప్రభుత్వం జర్నలిస్టులకు కరోనా టెస్టులు చేయించాలని.. ప్రత్యేక వైద్య సేవలు అందించాలని డిమాండ్ చేశారు. దీంతో సానుకూలంగా స్పందించిన స‌ర్కార్ వైద్యసిబ్బంది, పోలీసులతో సమానంగా జర్నలిస్టులకు ప్రత్యేక వైద్య సేవలు అందించాలని నిర్ణయించింది. గాంధీ ఆస్ప‌త్రిలో జర్నలిస్టులకు చికిత్స అందించడం కోసం మనోజ్ పేరిట ప్రత్యేక వార్డును ఏర్పాటు చేసింది. జర్నలిస్టులకు కరోనా టెస్టులు చేసే ప్రక్రియను ప్రారంభించింది. పాజిటివ్‌గా తేలిన వారికి మనోజ్ పేరిట ఏర్పాటు చేసిన వార్డులో చికిత్స అందిస్తారు.
