రేవంత్‌ స్టైలే వేరు! సెల్‌ఫోన్‌లో చూస్తూ ప్రమాణం

తెలంగాణ కాంగ్రెస్ ఫైర్ బ్రాండ్ రేవంత్ రెడ్డి తొలిసారి ఎంపీగా పార్లమెంట్‌లో ప్రమాణ స్వీకారం చేశారు. అయితే అందరిలా రెగ్యులర్‌గా ప్రమాణం చేస్తే ఆయన రేవంత్ ఎందుకు అవుతారు…ఆయకంటూ ఒక స్టైల్, ఫార్మాట్ ఉంటాయ్. అందుకే రేవంత్  అధికారులు ఇచ్చే పత్రాన్ని తీసుకోకుండా సెల్‌ఫోన్ చూస్తూ ప్రమాణం చేశారు. తాను చెప్పదలుచుకున్నది సెల్‌ఫోన్‌లో ముందుగానే టైప్ చేసుకుని వచ్చిన రేవంత్ రెడ్డి… సెల్ ఫోన్ చూసుకుంటూ తన ప్రసంగాన్ని పూర్తి చేశారు. తెలుగులోనే తన ప్రసంగాన్ని కొనసాగించిన ఆయన… దైవసాక్షిగా ప్రమాణం చేశారు. రేవంత్ రెడ్డి ప్రమాణస్వీకారం సందర్భంగా కేంద్రమంత్రి కిషన్ రెడ్డి బల్లలు చరిచి అభినందనలు తెలిపారు.

మల్కాజ్ గిరి బరిలో కాంగ్రెస్ తరపున ఎంపీగా పోటీ చేసిన రేవంత్ రెడ్డి… తన ప్రత్యర్థి అయిన టీఆర్ఎస్ అభ్యర్థి మర్రి రాజశేఖర్ రెడ్డిపై విజయం సాధించి లోక్ సభలో అడుగుపెట్టారు. తెలంగాణ అసెంబ్లీ ఎన్నికల్లో కొడంగల్‌లో ఎమ్మెల్యేగా పోటీ చేసి ఓడిపోయిన రేవంత్ రెడ్డి… ఆరు నెలల తిరగకముందే ఎంపీగా విజయం సాధించారు.