‘ట్రంప్ ఓ మొగాంబో’.. కాంగ్రెస్ ఫైర్..

అమెరికా అధ్యక్షుడు ట్రంప్ ను కాంగ్రెస్ పార్టీ…  బాలీవుడ్ విలన్ ‘ మొగాంబో’ గా అభివర్ణించింది. (‘మిస్టర్ ఇండియా’ చిత్రంలో దివంగత నటుడు అమ్రిష్ పురి.. ‘మొగాంబో’ గా విలన్ పాత్ర పోషించిన సంగతి తెలిసిందే). అమెరికా అధ్యక్షుడిని ఆహ్వానించేందుకు కేంద్రం కోట్లాది రూపాయలను ఖర్చు చేయడమేమిటని కాంగ్రెస్ నేత అధిర్ రంజన్ చౌదరి ప్రశ్నించారు.

‘మొగాంబో’ ను హ్యాపీగా ఉంచేందుకు ప్రభుత్వం అన్ని ప్రయత్నాలూ చేస్తోందన్నారు. ప్రభుత్వ ఖజానా నుంచి ఇన్ని కోట్ల రూపాయలు వ్యయం చేయవలసిన అవసరం ఉందా ? ఆయనను సంతోషపెట్టేందుకు మురికివాడల్లోని పేదలను  బలవంతంగా వారి ఇళ్లనుంచి ఖాళీ చేయిస్తారా ? అని కూడా చౌదరి అన్నారు. గుజరాత్ రాష్ట్రాన్ని మోదీ ఆదర్శవంతంగా తీర్చిదిద్దారని అందరూ చెబుతారని, కానీ ఆ రాష్ట్రంలో మురికివాడవాసులను నిర్లక్ష్యం చేస్తున్నారని ఆయన దుయ్యబట్టారు. ఇదంతా ట్రంప్ ను సంతోషపెట్టడానికి  కాదా అన్నారు. ట్రంప్ కు గౌరవసూచకంగా ఈ నెల 25 న రాష్ట్రపతి భవన్ లో నిర్వహించే విందును తాము తిరస్కరిస్తున్నామని చెప్పిన ఆయన.. తమ పార్టీ అధినేత్రి సోనియా గాంధీకి అసలు ఆహ్వానమే అందలేదన్నారు. విపక్షాలను పిలవరా అని కూడా ఆయన ప్రశ్నించారు. అమెరికాలోని హూస్టన్ లో ‘హౌడీ మోడీ’ కార్యక్రమాన్ని నిర్వహించినప్పుడు రిపబ్లికన్లు, డెమొక్రాట్లు కూడా వేదికను అలంకరించిన విషయాన్ని చౌదరి గుర్తు చేశారు.