Chandrababu వాలెంటీర్లను వద్దన్న వారే వారికి పనివ్వమంటున్నారు!

Chandrababu writes letter to Jagan: కరోనా పుణ్యమాని పలు అంశాల్లో, పలువురి వైఖరిలో మార్పులు వస్తున్నాయి. సామాజిక దూరాన్ని పాటించమని చెబుతూనే కొందరు చిరకాలంగా దూరంగా వున్న నేతలు కలిసిపోతుంటే.. ఒక విధానాన్ని వ్యతిరేకించిన వారే.. తిరిగి కరోనా నియంత్రణలో ఆ యంత్రాంగాన్ని వాడుకోవాలని ప్రభుత్వానికి సూచిస్తున్నారు. సరిగ్గా ఇదే జరిగిందిపుడు ఆంధ్రప్రదేశ్ రాష్ట్రంలో.

ఏపీలో విపక్ష నేత చంద్రబాబు మంగళవారం నాడు ముఖ్యమంత్రి జగన్ మోహన్ రెడ్డికి లేఖ రాశారు. కరోనా నియంత్రణ కోసం ప్రకటించిన లాక్ డౌన్ సందర్భంగా ప్రజలు పడుతున్న ఇబ్బందులను నివారించాలన్నది చంద్రబాబు రాసిన లేఖ సారాంశం. లాక్ డౌన్ వల్ల గత పది రోజులుగా ప్రజలు పడుతున్న ఇబ్బందులను చంద్రబాబు ప్రభుత్వం దృష్టికి తెచ్చారు. నిత్యావసర వస్తువులు, కూరగాయలు.. తదితర అత్యవసర వస్తువుల కోసం అల్లాడిపోతున్న పరిస్థితి. చేతినిండా డబ్బులున్న వారి సంగతి పక్కన పెడితే.. ఏ రోజుకారోజు సంపాదన మీద ఆధారపడి బతుకుతున్న వారి పరిస్థితి మరింత అధ్వాన్నంగా మారింది.

ఈ క్రమంలో పేదలకు రేషన్ సప్లై చేయడం ప్రభుత్వానికి మొదటి ప్రాధాన్యం కావాలన్నారు చంద్రబాబు నాయుడు. రేషన్ సరుకుల కోసం పెద్ద సంఖ్యలో జనం బయటికి రావడం కూడా కరోనా వ్యాప్తి దృష్ట్యా మంచిది కాదన్న చంద్రబాబు రేషన్ సరుకుల పంపిణీకి వాలెంటీర్ల వ్యవస్థను వినియోగించుకోవాలని సూచించారు చంద్రబాబు. ఈ అంశాన్ని తన లేఖలో ప్రధానంగా ప్రస్తావించారు చంద్రబాబు. కొన్ని చోట్ల గ్రామాల్లో బయోమెట్రిక్ ద్వారా రేషన్ ఇవ్వడం ద్వారా సర్వర్ డౌన్ వంటి సమస్యలు ఎదురవుతున్నాయని పేర్కొన్నారు. ఎమెర్జెన్సీ టైం కాబట్టి బయోమెట్రిక్ నుంచి మినహాయింపునివ్వాలని, వాలెంటీర్ల ద్వారా రేషన్ పంపిణీ చేయాలని చంద్రబాబు తన లేఖలో ముఖ్యమంత్రిని కోరారు.

లాక్ డౌన్ కారణంగా పేదలకు ప్రతి ఇంటికి 5 వేల రూపాయలు తక్షణం ఇవ్వాలని, రైతులు పండించిన పంటకు కనీస మద్దతు ధర ఇచ్చి రైతులను ఆదుకోవాలని చంద్రబాబు డిమాండ్ చేశారు. అయితే.. గత ఆరు నెలలుగా గ్రామ, వార్డు వాలెంటీర్ల వ్యవస్థను వైసీపీ కార్యకర్తలకు ఉపాధి అంటూ వ్యతిరేకించిన చంద్రబాబు.. సడన్‌గా ఆ వ్యవస్థను వినియోగించుకోవాలంటూ సలహా ఇవ్వడం చర్చనీయాంశమైంది.