Breaking జూన్ 30 వరకు లాక్ డౌన్ పొడిగింపు
దేశవ్యాప్తంగా మరో నెల రోజుల పాటు లాక్ డౌన్ పొడిగించాలని కేంద్ర ప్రభుత్వం నిర్ణయించింది. పొడిగింపు తథ్యమే అనుకున్నా ఏకంగా నెల రోజుల పాటు లాక్ డౌన్ను పొడిగించడం సంచలనంగా మారింది.
దేశవ్యాప్తంగా మరో నెల రోజుల పాటు లాక్ డౌన్ పొడిగించాలని కేంద్ర ప్రభుత్వం నిర్ణయించింది. పొడిగింపు తథ్యమే అనుకున్నా ఏకంగా నెల రోజుల పాటు లాక్ డౌన్ను పొడిగించడం సంచలనంగా మారింది. ఆదివారం రాత్రితో నాలుగో విడత లాక్ డౌన్ ముగియనున్న నేపథ్యంలో శనివారం సాయంత్రమే కేంద్ర ప్రభుత్వం సంచలన నిర్ణయం తీసుకుంది. జూన్ 30వ తేదీ వరకు లాక్ డౌన్ను పొడిగిస్తున్నట్లు ప్రకటించింది.
అయితే నాలుగో విడతతో పోలిస్తే చాలా వరకు మినహాయింపులను ఇవ్వబోతున్నట్లు కేంద్ర హోం శాఖ జారీ చేసిన ప్రెస్ నోట్ ఆధారంగా తెలుస్తోంది. జూన్ ఎనిమిదో తేదీ నుంచి దేశంలో మత సంబంధ ప్రార్థనా స్థలాలు, దేవాలయాలను తెరవబోతున్నట్లు తాజాగా విడుదల చేసిన విధివిధానాలలో పేర్కొన్నారు. హోటళ్ళు, రెస్టారెంట్లు, షాపింగ్ మాల్స్ కూడా జూన్ 8వ తేదీ నుంచి ఓపెన్ చేసుకునే వెసులుబాటును కేంద్ర హోం శాఖ కల్పించబోతోంది.
అయితే, కంటైన్మెంట్ జోన్లకు మాత్రం ఈ మినహాయింపులు వర్తించబోవని తాజా విధివిధానాలలో పేర్కొన్నారు. జూన్ 8వ తేదీ నుంచి జూన్ 30వ తేదీ వరకు దశల వారీగా దేశంలో లాక్ డౌన్ ఎత్తివేయనున్నట్లు హోం శాఖ తెలిపింది. ఇందులో భాగంగా జూన్ 8వ తేదీ నుంచి దేవాలయాలు, మసీదులు, చర్చీలు, షాపింగ్ మాల్స్, రెస్టారెంట్లు, హోటల్స్ తెరిచే ఛాన్స్ కల్పించబోతున్నారు. తాజా విధివిధానాలను పరిశీలిస్తే.. లాక్ డౌన్ అనడం కంటే అన్ లాక్ డౌన్ అనడం ఉత్తమమన్న కామెంట్లు వినిపిస్తున్నాయి.