బాలీవుడ్ స్టార్స్ ‘హిపోక్రైట్లా’ ? వాళ్ళు చెప్పేదొకటి.. చేసేదొకటట !

అమెరికాలో నల్ల జాతీయుడు జార్జి ఫ్లాయిడ్ మృతిని ఖండిస్తూ.. నల్ల జాతీయుల సంక్షేమానికి కృషి చేస్తున్న ‘బ్లాక్ లివ్స్ మ్యాటర్’ ఉద్యమానికి మద్దతునిస్తున్న బాలీవుడ్ సెలబ్రిటీలపై పలువురు ట్విటర్ యూజర్లు సోషల్ మీడియాలో దుమ్మెత్తిపోశారు. వివరాల్లోకి వెళ్తే.. .. ప్రియాంక చోప్రా, ఆమె భర్త నిక్ జొనాస్ ఈ ఉద్యమ సంస్థకు సపోర్టుగా ట్వీట్ల మీద ట్వీట్లు చేశారు. ‘ఈక్వల్ జస్టిస్’ పేరిట ఈ సంస్థకు వారు విరాళాలు కూడా అందజేశారు. ఈ ఉద్యమానికి సంఘీభావం ప్రకటిస్తూ ప్రియాంక గత మే 30 న తన ఇన్ స్టా గ్రామ్ లో పోస్ట్ పెట్టింది. రేసిజాన్ని (జాతి వివక్షను) అంతం చేసేందుకు అంతా పాటు పడాలని, తమ చర్మపు (స్కిన్) కారణంగా ఎవరూ .., ఏ దేశంలోనూ మరొకరి చేతిలో చావుకు గురి కాకూడదని ఆమె పేర్కొంది. అయితే ట్విటర్ యూజర్లు ఆమెను వదిలిపెట్టలేదు. ‘మరి..అమ్మడూ ! చర్మం రంగు తెల్లబడాలంటూ ఇండియాలో మీరు ఆయా క్రీమ్ బ్రాండ్లకు ప్రచారం ఇస్తున్న మాటేమిటి ? ‘ అని ప్రశ్నించారు. గ్యార్నర్ స్కిన్ వైట్ నింగ్ క్రీమ్ కోసం మీరిచ్చిన యాడ్ సంగతి  మరిచారా ? అని మరొకరు ట్వీట్ చేశారు. ‘యూజ్ గ్యార్నియర్  వైట్ ఫెయిర్ నెస్ క్రీమ్… 1…2…3..స్పాట్ ఫ్రీ’.. అని వ్యంగ్యంగా ఇంకొకరు పేర్కొన్నారు.

ఇంకా నల్లజాతీయుల ఉద్యమాన్ని సమర్థించిన దిశా పటానీ, సోనమ్ కపూర్, అభయ్ డియోల్ వంటి ఇతర బాలీవుడ్ స్టార్ల పేర్లనూ  వారు   ప్రస్తావించారు. ఒక విధంగా చెప్పాలంటే మీ హిపోక్రసీ బయటపడింది అని విమర్శించారు. అయితే ఈ ట్వీట్లపై ఈ స్టార్ల మేనేజర్లు గానీ, సన్నిహితులు గానీ స్పందిస్తే ఒట్టు !