బీజేపీ ఎంపీలకు మోదీ క్లాస్..! ఉంటుందా మరి రిజల్ట్ ?

పార్లమెంటులో తమ పార్టీ ఎంపీలు హుందాగా ఎలా మెలగాలో, సభలోనే కాక, బయట కూడా మర్యాదగా ఎలా ప్రవర్తించాలో, తాము ఎంపీలమన్న ‘ దూకుడును ‘ ఎలా తగ్గించుకోవాలో వారికి శిక్షణనిచ్చేందుకు ఉద్దేశించిన రెండు రోజుల పార్టీ వర్క్ షాప్ ఢిల్లీలో ప్రారంభమైంది. ప్రధాని మోదీ, హోం మంత్రి అమిత్ షా, రక్షణ శాఖ మంత్రి రాజ్ నాథ్ సింగ్, బీజేపీ వర్కింగ్ ప్రెసిడెంట్ జె.పి. నడ్డా ఆధ్వర్యంలో శనివారం ఈ వర్క్ షాప్ మొదలైంది. తమ పార్టీ ఎంపీలంతా తప్పనిసరిగా పార్లమెంటుకు హాజరు కావాలని ఈ శిక్షణ శిబిరంలో నేతలు పిలుపునిచ్చారు. మీడియాకు అనుమతి లేని ఈ ‘ బీజేపీ అభ్యాస వర్గ ‘ లో సభ్యుల ప్రవర్తన, క్రమశిక్షణ, పార్లమెంటరీ ప్రొసీజర్, సిధ్ధాంత పరమైన అంశాలపై ఎంపీలకు శిక్షణ ఇస్తున్నారు. మొదట నడ్డా ఇనాగురల్ స్పీచ్ ఇస్తూ.. పార్లమెంటుకు ఎంపీల రెగ్యులర్ అటెండ్స్ ఎంతయినా ముఖ్యమన్నారు. ఈ సాయంత్రం అమిత్ షా మరికొన్ని అంశాలపై ‘ బోధించనున్నారు ‘. బీజేపీ క్రమశిక్షణ తరగతుల పేరిట ఓ ఫోటో కాపీని మాత్రం నాయకులు మీడియాకు ఇవ్వడం విశేషం. అటు-మోదీ ఆదివారం ప్రసంగించనున్నారు. కొంతమంది ఎంపీలు అదేపనిగా నోరు పారేసుకుని పార్టీని ఇరకాటాన బెట్టడాన్ని, వివాదాలు సృష్టించడాన్ని పార్టీ అధిష్టానం తీవ్రంగా పరిగణిస్తోంది. ‘ అభ్యాస వర్గ ‘ అన్న శిక్షణను హిమాచల్ ప్రదేశ్ తో బాటు కొన్ని రాష్ట్రాల్లో నిర్వహిస్తున్నారు. తొలిసారిగా ఎంపీలుగా ఎన్నికైనవారికి ఈ వర్క్ షాపులో తగిన సూచనలు, సలహాలు ఇవ్వనున్నారు. అలాగే సీనియర్ నేతలు జూనియర్లకు తమ హక్కులు, బాద్యతలను ఎలా నిర్వర్తించాలో కూడా వివరించనున్నారు. ఈ విధమైన శిక్షణ తరగతులు రెగ్యులర్ గా జరుగుతాయని సీనియర్ ఎంపీ ఒకరు తెలిపారు. మహాత్మా గాంధీని నాథూరామ్ గాడ్సే హత్య చేయడంపై గాడ్సేని పొగుడుతూ మొదటిసారి ఎంపీ అయిన ప్రజ్ఞా ఠాకూర్ చేసిన వ్యాఖ్యలు ఇటీవల కలకలం రేపాయి. పైగా బీజేపీ కార్యకర్తల సమావేశంలో మాట్లాడిన ఆమె.. టాయిలెట్లను కడగడానికి తాము ఎంపీలం కాలేదని కామెంట్ చేసి మరో వివాదాన్ని సృష్టించారు. 2008 మాలెగావ్ బ్లాస్ట్ కేసులో నిందితురాలైన ఈమె.. యవ్వారంపై బీజేపీ హైకమాండ్ సీరియస్ అయింది.. ప్రజ్ఞా ఠాకూర్ ని పిలిపించి నేతలు గట్టిగా మందలించారు. ఇక ఇదే పార్టీకి చెందిన రామ్ శంకర్ కథేరియా.. గార్డులు ఆగ్రా సమీపంలో టోల్ ప్లాజా ఉద్యోగులైన కొందరిని చితకబాదిన ఉదంతం తాలూకు వీడియో పార్టీకి తలనొప్పిని తెచ్చింది. ఈ సీసీటీవీ ఫుటేజీలు చూసి నేతలు ఆశ్చర్యపోయారు. అలాగే ఉన్నావ్ రేప్ కేసులో జైలుశిక్ష అనుభవిస్తున్న ఎమ్మెల్యే కుల్దీప్ సింగ్ సెంగార్ ని చూసేందుకు పార్టీ ఎంపీ సాక్షి మహారాజ్ జైలుకు వెళ్లడాన్ని కూడా పార్టీ తీవ్రంగా పరిగణించింది. ఇతడిని (సెంగార్ ని)పార్టీనుంచి బహిష్కరించారు. ఉత్తరాఖండ్ కు చెందిన పార్టీనేత కున్వర్ ప్రణవ్ సింగ్ తన బర్త్ డే రోజున తుపాకులు చూపుతూ సెలబ్రిటీ చేసుకుని ఆ వీడియోను వైరల్ చేశాడు. అది కూడా కమలనాథుల కంట బడింది. మధ్యప్రదేశ్ లో ఇండోర్ మాజీ ఎమ్మెల్యే ఆకాష్ విజయ్ వర్గీయ.. ఓ మున్సిపల్ అధికారిని క్రికెట్ బ్యాట్ తో కొట్టిన వైనం కూడా ఇలాంటిదే..ముఖ్యంగా ప్రధాని మోదీ సంబంధిత వీడియో చూసి ఆగ్రహం పట్టలేకపోయారు. ఫలితంగా ఆకాష్ ను పార్టీనుంచి వెంటనే సస్పెండ్ చేశారు. ఇక-పార్లమెంటుకు హేమమాలిని, సన్నీ డియోల్ వంటి సెలబ్రిటీలు, ఇతర ప్రముఖులు డుమ్మా కొడుతున్న వైనాన్ని కూడా బీజేపీ అధిష్టానం తీవ్రంగా పరిగణిస్తోంది. ఇలాంటివాటికి చెక్ పెట్టేందుకే పార్టీ ఈ విధమైన వర్క్ షాప్ నిర్వహణకు పూనుకొంది. మరి.. దీనివల్ల ప్రయోజనం ఉంటుందా అన్నది కాలమే తేల్చాలి.