వాట్సాప్ ఆంక్షలా..? నెవర్ మైండ్ !

ఇండియాలో ఎన్నికల కోలాహలం ముగింపు దశకు చేరుకోనుంది. ఈ నెల 19 తో ఈ ‘ సంరంభం ‘ ముగుస్తోంది. ఈ సీజన్ లో వాట్సాప్ దుర్వినియోగాన్ని అరికట్టడానికి, రాజకీయ విద్వేష ప్రచారాన్ని అడ్డుకోవడానికి, తప్పుడు ప్రచారాలకు కళ్ళెం వేయడానికి ‘ పాపం ‘ వాట్సాప్ కొన్ని ఆంక్షలు విధించింది. ముఖ్యంగా యూజర్లు కేవలం అయిదుగురికి మాత్రమే సందేశాలను పంపాలన్నది వీటిలో ఒకటి. దీనివల్ల మంచి ఫలితం ఉంటుందని భావించింది. కానీ…  తానొకటి తలిస్తే..అన్నట్టు దీనికి విరుగుడుగా కేవలం వెయ్యి రూపాయలకు లభించే సాఫ్ట్ వేర్ టూల్..మార్కెట్లను ముంచెత్తుతోంది. డిజిటల్ మార్కెట్లలో రాజకీయ నేతలు, పార్టీల కార్యకర్తలు ఈ టూల్ కోసం ఎగబడుతున్నారు.ఈ సరికొత్త టూల్ ఉంటే చాలు.. యూజర్లు..అయిదుగురికి కాదు.. వేలాదిమందికి ఒకేసారి మెసేజులను పంపవచ్చు. ఇదే అదననుకుని కాంగ్రెస్, బీజేపీ శ్రేణులు దీనికోసం తహతహలాడుతున్నారు. ఢిల్లీలో రోహితాష్ అనే వ్యాపారి ఈ టూల్ ని అమ్ముతూ బాగానే సొమ్ము చేసుకుంటున్నాడు. ఈ మధ్యే ఇద్దరు బీజేపీ కార్యకర్తలకు దీన్ని అమ్మానని బాహాటంగానే ఈయన చెబుతున్నాడు. తన అంచనా ప్రకారం.. ఇటీవలి నెలల్లో కేవలం ఒక్క టూల్.. లక్ష వాట్సాప్ సందేశాలను పంపగలిగిందట. తన రెండు గదుల ఇంటి నుంచే ఈయన ఈ దందా నడుపుతున్నాడు. బీజేపీతో బాటు అనేకమంది కాంగ్రెస్ కార్యకర్తలు కూడా ఆన్ లైన్ లో లభించే ఫ్రీ క్లోన్ యాప్స్ ను యధేచ్చగా వాడుతూ..తెరవెనుక ప్రచారాలు చేస్తున్నట్టు వెల్లడైంది. వాట్సాప్ ఇలా దుర్వినియోగమవుతోందన్న విషయాన్ని రాయిటర్స్ వార్తా సంస్థ గమనించింది. ఇండియాలోని అమెజాన్ డాట్ కామ్ లో కనీసం మూడు సాఫ్ట్ వేర్ టూల్స్ లభ్యమవుతున్నాయట. ఈ వార్తా సంస్థ జర్నలిస్టు ఒకరు వీటిని కొనుగోలు చేసినప్పుడు.. ఎలాంటి కంపెనీ బ్రాండ్ పేరు గానీ లేకుండా కార్డు బోర్డు బాక్సుల్లో కాంపాక్ట్ డిస్క్ లుగా ఇవి ‘ దర్శనమిచ్చాయి ‘. అయితే ఈ యవ్వారంపై స్పందించడానికి వాట్సాప్ ప్రతినిధి ఒకరు నిరాకరించారు. ఎవరైనా ఇలాంటి అనుచిత చర్యలకు పాల్పడితే లీగల్ చర్య తీసుకుంటామని మాత్రం ఆయన హెచ్చరించారు. ఢిల్లీలో ఓ డిజిటల్ మార్కెటీర్..ఒక నెల సర్వీసుకు గాను లక్షన్నర రూపాయలు చార్జి చేస్తున్నాడంటే ఇది ఎంత స్థాయికి చేరుకుందో అర్థమవుతోందని అంటున్నారు. ఇతని దందా కారణంగా సుమారు మూడు లక్షల వాట్సాప్ సందేశాలు  వెళ్లిపోయాయని తెలిసింది.

‘ బిజినెస్ సెండర్ ‘ అనే సాఫ్ట్ వేర్ టూల్ అమ్మకాలవల్ల  ఇతనికి బాగానే సొమ్ములు ముడుతున్నాయి. మొత్తానికి వాట్సాప్ రెస్ట్రిక్షన్స్ జస్ట్ మొక్కుబడిగా..వార్తల్లో చదువుకోవడానికే పనికొస్తున్నాయన్న మాట !