కరోనా ఎఫెక్ట్‌: టికెట్ల జారీ కోసం ఏపీఎస్‌ఆర్టీసీ వినూత్న కార్యక్రమం

కరోనా నేపథ్యంలో ఇప్పటికే ఆర్టీసీ సేవల్లో పలు మార్పులు చేసిన ఏపీ.. మరో వినూత్న కార్యక్రమానికి శ్రీకారం చుట్టబోతోంది. నగదు రహిత లావాదేవీల ద్వారా టికెట్లు జారీ చేయాలని ఆర్టీసీ నిర్ణయం తీసుకుంది. ఈ క్రమంలో ప్రథమ్ మొబైల్‌ యాప్‌ను తీసుకురాబోతున్న ఆర్టీసీ.. ఆ నెల 20 నుంచి ఈ యాప్ ద్వారానే టికెట్లను జారీ చేయబోతోంది. ఈ క్రమంలో తొలి దశలో ప్రయోగాత్మకంగా 19 డిపోల పరిధిలో మొబైల్ యాప్‌ ద్వారా టికెట్లను జారీ చేయాలని ఎండీ నిర్ణయం తీసుకున్నారు.

విజయవాడ, మచిలీపట్నం, విజయనగరం, శ్రీకాకుళం-1, కర్నూలు, విశాఖపట్నం, అనకాపల్లి, ఏలూరు, రాజమహేంద్రవరం, అమలాపురం, రావుల పాలెం, నెల్లూరు -1, చిత్తూరు-2, తిరుపతి, కర్నూలు-1, తాడిపత్రి, గుంటూరు -2 డిపోల్లో ఈ యాప్‌ ద్వారా టికెట్లను జారీ చేయనున్నారు. ఈ నేపథ్యంలో కరోనా వ్యాప్తి చెందకుండా కండక్టర్లు, డ్రైవర్లు ప్రత్యేక మొబైల్ సమకూర్చుకోవాలని ఎండీ ఆదేశించారు. సూచించిన ప్రమాణాల మేరకు సిబ్బంది స్మార్ట్ ఫోన్లు సమకూర్చుకోవాలని.. యాప్ సహా అవసరమైన సాఫ్ట్‌వేర్‌ ఆర్టీసీ అందిస్తుందని ఎండీ తన ఆదేశాల్లో పేర్కొన్నారు. ఈ మేరకు చర్యలు తీసుకోవాలని ఈడీలు, అన్ని జిల్లాల ఆర్ఎంలకు ఎండీ మాదిరెడ్డి ప్రతాప్ ఆదేశాలు జారీ చేశారు.