APSRTC losses: ఆర్టీసీ కొంపముంచిన కరోనా లాక్‌డౌన్.. ఈ ఏడాది ఏపీఎస్‌ఆర్టీసీకి వచ్చిన నష్టం ఎంతంటే..?

కరోనా మహమ్మారి ప్రపంచాన్ని కుదేపిసింది. లాక్‌డౌన్ కారణంగా రవాణా వ్యవస్థ పూర్తిగా నిలిచిపోయింది. ఇటు ఆంధ్రప్రదేశ్ రాష్ట్రానికి చెందిన ఆర్టీసీ బస్సులకు కరోనా సమయంలో ఒక్క బస్సు కూడా రోడ్డెక్కలేదు. దీంతో కోవిడ్‌-19 లాక్‌డౌన్‌ ప్రభావంతో ఈ ఏడాది ఏపీఎస్ఆర్టీసీకి రూ.2,528 కోట్ల నష్టం వాటిల్లిందని సంస్థ ఎండీ కృష్ణబాబు తెలిపారు. నెలల పాటు బస్సులు డిపోలకే పరిమితమవడంతో 78.84 కోట్ల కిలోమీటర్లు బస్సులు నడవలేదని ఆయన వెల్లడించారు. అయితే, అత్యవసర సమయంలో కొందరికి మాత్రమే బస్సులను అందుబాటులోకి తెచ్చామన్నారు. పోలీసు, వైద్య సిబ్బందితో కలిసి తామూ కరోనా సమయంలో ప్రజలకు సేవలందించామన్నారు.

కాగా, కరోనా ప్రభావంతో ఆంధ్రప్రదేశ్ వ్యాప్తంగా ఆర్టీసీ సిబ్బందిలో 5,586 మంది కరోనా బారినపడగా, అందులో 91మంది ప్రాణాలు కోల్పోయారని తెలిపారు. అకాల మరణంతో ప్రాణాలను కోల్పోయిన సిబ్బంది కుటుంబాలను ఆదుకునేందుకు ఆర్టీసీ ముందుకువచ్చిందన్న కృష్ణబాబు.. ఒక రోజు వేతనాన్ని రూ.5లక్షల చొప్పున ఆ 91 కుటుంబాలకు ఇచ్చామన్నారు. కోవిడ్‌ వారియర్స్‌ బీమా రూ.50 లక్షల కోసం కేంద్రానికి లేఖ రాశామని చెప్పారు. గతేడాది నవంబరు 30 నాటికి ఆర్టీసీ ఆదాయం రూ.3,350 కోట్లు కాగా, ఈ ఏడాది అదే కాలానికి కేవలం రూ.827 కోట్లు మాత్రమే వచ్చాయన్నారు.

ఇక, కరోనా కేసుల సంక్య గణనీయం తగ్గుముఖంపడుతుండటంతో ఇప్పుడిప్పుడే బస్సులు రోడ్డెక్కుతున్నాయి. దీంతో బస్సుల ఆక్యుపెన్సీ పుంజుకుంటోందని, మార్చి-2021 నాటికి పూర్వస్థితికి చేరుకోగలదని కృష్ణబాబు ధీమా వ్యక్తం చేశారు. జనవరి నుంచి పల్లె ప్రాంతాలకు సైతం అద్దె బస్సులు నడుపుతామని చెప్పారు. ఇక, సంక్రాంతి పండుగ సందర్భంగా 3,607 ప్రత్యేక బస్సులు నడుపుతున్నామని, వాటిలో 50శాతం అదనపు చార్జీ వసూలు చేస్తామని తెలిపారు. తెలంగాణకు త్వరలో 45వేల కిమీ మేరకు బస్సులు పెంచాల్సి ఉందని, ఆ రాష్ట్రంతో చర్చలపై త్వరలో నిర్ణయం తీసుకుంటామన్నారు. కార్గో వ్యాపారం అభివృద్ధికి ప్రవేటు సంస్థలతో ఒప్పందం చేసుకోబోతున్నట్లు వెల్లడించారు. సిబ్బందికి చెల్లించాల్సిన బకాయిలను త్వరలోనే అందిస్తామన్నారు. ఇప్పటి వరకూ 5,200 మంది అవుట్‌ సోర్సింగ్‌ సిబ్బందిని తిరిగి విధుల్లోకి తీసుకున్నామని, అవసరం మేరకు మిగతా వారిని కూడా చేర్చుకుంటామని ఎండీ కృష్ణబాబు వెల్లడించారు. అలాగే, బిల్లుల చెల్లింపులో జాప్యం వల్ల కాంట్రాక్టర్లు ముందుకు రాలేదని, ప్రభుత్వం ఇటీవల చెల్లించినందున సమస్య తీరిందన్నారు.