టీడీపీ ఎమ్మెల్యేకు మంత్రి అనిల్ ఫోన్..ఎందుకంటే..

ఆంధ్ర‌ప్ర‌దేశ్ లో అధికార వైసీపీ, ప్ర‌తిప‌క్ష టీడీపీ మ‌ధ్య ప‌చ్చ‌గ‌డ్డి వేస్తే భ‌గ్గుమంటుంది. ప్ర‌స్తుతం క‌రోనా సంక్షోభ స‌మ‌యంలో కూడా నాయ‌కులు సోష‌ల్ మీడియా వేదిక‌గా ఒక‌రిపై ఒక‌రు విమ‌ర్శల దాడి కొనసాగిస్తున్నారు. ఈ స‌మయంలో ఏపీ మంత్రి అనీల్ కుమార్ యాదవ్..ఓ టీడీపీ ఎమ్మెల్యేకి ఫోన్ చేసి ప‌లు విష‌యాలు చ‌ర్చించారు. ఇంత‌కీ ఆ ఎమ్మెల్యే ఎవ‌రు..వారు చ‌ర్చించిన అంశాలు ఏంటి..ఈ స్టోరీలో చూద్దాం.

టీడీపీ ఎమ్మెల్యేలు గొట్టిపాటి రవికుమార్, డోలా బాలవీరాంజనేయ స్వామి, ఏలూరి సాంబశివరావులు రాసిన లేఖకు మంత్రి అనీల్ కుమార్ యాదవ్ సానుకూలంగా స్పందించారు. ప్రకాశం జిల్లాలో నీటి ఎద్దడిని తీర్చేందుకు చెరువులను సాగర్ నీటితో నింపాలని, ఎండాకాలంలో ప్ర‌జ‌ల‌కు తాగునీటి ఇబ్బందులు లేకుండా చూడాలని ఎమ్మెల్యేలు లేఖ‌లో కోరారు. దీనిపై మంత్రి అనీల్​ కుమార్​ యాదవ్​ అద్దంకి ఎమ్మెల్యే గొట్టిపాటి రవికుమార్​కు ఫోన్ చేసి మాట్లాడారు. వేసవిలో తాగునీటి ఇబ్బందులు లేకుండా చర్యలు తీసుకుంటామ‌ని హామీ ఇచ్చారు. జిల్లా మంత్రి బాలినేని శ్రీనివాసరెడ్డి ఇదివరకే ఈ అంశాన్ని తనతో చ‌ర్చించార‌ని, పరిశీలనలో ఉందని తెలిపారు. కలెక్టర్​తో మాట్లాడి పూర్తి స‌మాచారాన్ని తెలుసుకుని చ‌ర్య‌లు తీసుకుంటామని మంత్రి అనీల్ కుమార్ యాదవ్ చెప్పారు.