జగన్ మంచి మనసు.. యువతి ప్రాణాలకు భరోసా!

అధికారంలో ఉన్నా.. ప్రతిపక్షంలో ఉన్నా.. తానెప్పుడూ ప్రజల మనిషినేని ఏపీ సీఎం వైఎస్ జగన్మోహన్ రెడ్డి పలు సందర్భాల్లో తన మానవత్వాన్ని చాటుకున్నారు. వైఎస్ రాజశేఖర్ రెడ్డి బిడ్డగా.. ప్రజల సంక్షేమమే ధ్యేయంగా ముందుకు సాగుతున్న జగన్.. ఎప్పుడు సహాయం కావాలన్నా సిద్ధంగా ఉన్నానంటున్నారు. ఇప్పుడు ఇదంతా ఎందుకు చెబుతున్నానంటే.. హాస్పిటల్‌లో ప్రాణాలతో పోరాడుతున్న కూతురుకు ఆపరేషన్ చేయించుకోలేని స్థితిలో ఉన్న తండ్రికి.. నేనున్నానంటూ జగన్ ఆపన్న హస్తం అందించారు.

వివరాల్లోకి వెళ్తే.. రెండు రోజుల క్రితం హైదరాబాద్ బయోడైవర్సిటీ ఫ్లై ఓవర్‌పై కారు అదుపు తప్పి.. కింద పడిన సంగతి తెలిసిందే. ఈ ఘటనలో ఓ మహిళ అక్కడికక్కడే మృతి చెందగా.. మరో యువతి తీవ్ర గాయాలపాలై.. హాస్పిటల్‌లో ప్రాణాలతో పోరాడుతోంది. సదరు యువతికి త్వరగా ఆపరేషన్ చేయాలని డాక్టర్లు చెప్పగా.. అందుకోసం ఐదు లక్షలు వెంటనే కట్టాలని యువతి తండ్రికి చెప్పారు.

మధ్యతరగతి కుటుంబానికి చెందిన ఆ యువతి తండ్రి.. అంత మొత్తంలో డబ్బు కట్టడం అసాధ్యం. దిక్కుతోచని పరిస్థితిలో ఉన్న ఆ తండ్రి సహాయం కోసం ఎదురుచూస్తుండగా.. ఈ వార్త ఎలా వెళ్లిందో గానీ సోషల్ మీడియా ద్వారా ముఖ్యమంత్రి వరకు చేరింది. ఆయన వెంటనే ఆరోగ్య శ్రీ స్పెషల్ ఆఫీసర్ హరికృష్ణను హాస్పిటల్‌కు పంపించి ఆ యువతి వివరాలను సేకరించామన్నారు.

వివరాలు అందగానే  సీఎం వెంటనే స్పందించి.. ఆ యువతి ఆపరేషన్‌కు అయ్యే ఖర్చు మొత్తాన్ని సీఎం రిలీజ్ ఫండ్ నుంచి విడుదల చేయాలని అధికారులను ఆదేశించారు. అంతేకాకుండా యువతి మాములు స్థితికి వచ్చేవరకు అండగా నిలుస్తామని హామీ ఇచ్చారు. ఈ విషయం తెలుసుకున్న సదరు యువతి తల్లిదండ్రులు సీఎం జగన్‌కు కృతజ్ఞతలు చెప్పడమే కాకుండా.. ఈ వ్యవహారంలో సహాయపడిన ఆరోగ్యశ్రీ స్పెషల్ ఆఫీసర్ హరికృష్ణ, అనంతపురం ఎమ్మెల్యే అనంత వెంకట్రామిరెడ్డికి రుణపడి ఉంటామన్నారు.