మర్యాద రామన్న‌లోని ‘తెలుగమ్మాయి’ పాట రాయడానికి చాలా కష్టపడ్డా… సినీ గేయ రచయిత అనంత శ్రీరామ్…

సినిమా పాట రాయాలంటే కథకు, సన్నివేశానికి తగినట్లుగా రాయాలి. రైటర్స్‌కు దర్శక నిర్మాతలు ఓ సందర్భాన్ని చెప్పి దానికి అనుగుణంగానే పాట రాయాలని అంటారు. అయితే ఓ పాట గంటలో పూర్తయితే… కొన్ని పాటలు రోజుల తరబడి సమయం తీసుకుంటాయి. తనకు ఎదురైన అలాంటి ఓ సందర్భాన్ని అనంత శ్రీరామ్ తాజాగా చెప్పుకొచ్చారు. సునీల్‌, సలోని జంటగా ఎస్.ఎస్. రాజమౌళి దర్శకత్వంలో తెరకెక్కిన ‘మర్యాద రామన్న’ సినిమా భారీ విజయం సాధించిన సంగతి తెలిసిందే.

ఈ సినిమాలో హీరోయిన్ సలోని తాను వివాహం చేసుకునే వ్యక్తి ఎలా ఉండాలో ఊహించుకుని బొమ్మలు గీస్తుంటుంది. వాటిని చూసిన కుటుంబ సభ్యులు పిచ్చి గీతలు అంటూ ఏడిపిస్తుంటారు. ఆ బొమ్మల్లో ఏదో విషయం ఉందని హీరో సునీల్ ఆ కుటుంబ సభ్యులను ఇంప్రెస్‌ చేసేలా రాయాల్సిన గీతమిది. చాలా క్లిష్టమైన సన్నివేశం కావడంతో ఆ పాట రాయడానికి అనంత శ్రీరామ్‌కు ఏకంగా 43 రోజులు పట్టిందట. కీరవాణి, గీతా మాధురి ఆలపించిన ఈ పాట అప్పట్లో ప్రేక్షకులను విశేషంగా ఆకట్టుకుంది. ఈ పాట రచయితగా అనంత శ్రీరామ్‌కు ఎంతో పేరు తెచ్చిపెట్టింది కూడా.