దేశానికి అసమర్థుడైన అధ్యక్షుడు, ట్రంప్ పై మిషెల్ ఒబామా ఫైర్
అమెరికాకు అసమర్థుడైన అధ్యక్షుడు లభించాడని డొనాల్డ్ ట్రంప్ పై మాజీ అధ్యక్షుడు బరాక్ ఒబామా భార్య మిషెల్ ఒబామా మండిపడ్డారు. ఈ వైట్ హౌస్ ని చూసినప్పుడల్లా..ఓరిమి, సహనం,శాంతి బదులు...
అమెరికాకు అసమర్థుడైన అధ్యక్షుడు లభించాడని డొనాల్డ్ ట్రంప్ పై మాజీ అధ్యక్షుడు బరాక్ ఒబామా భార్య మిషెల్ ఒబామా మండిపడ్డారు. ఈ వైట్ హౌస్ ని చూసినప్పుడల్లా..ఓరిమి, సహనం,శాంతి బదులు అరాచకాలు, ప్రజలంటే ఏ మాత్రం లక్ష్యంలేని విధానాలు కనబడతాయని విమర్శించారు. ఈ దేశాధ్యక్షపదవికి ట్రంప్ తగడని ఆమె దుయ్యబట్టారు. విస్కాన్సిన్ లో జరిగిన డెమొక్రటిక్ కన్వెన్షన్ లో మాట్లాడిన ఆమె.. రానున్న ఎన్నికల్లో జో బిడెన్ గెలిచి అధ్యక్షునిగా ఎన్నికైన పక్షంలో ప్రజలకు వాస్తవాలు తెలియజేస్తారని, సైన్స్ ని విశ్వసిస్తారని అన్నారు. కోవిడ్ పై నిపుణులు చెబుతున్న సలహాలను, చేస్తున్న సూచనలను పెడచెవిన పెడుతున్న ట్రంప్ ను ఉద్దేశించి ఆమె పరోక్షంగా ఈ వ్యాఖ్య చేశారు. జోబిడెన్ తన ఎనిమిదేళ్ల ఉపాధ్యక్ష పదవీ కాలంలో చక్కని ప్రతిభ కనబరిచారని చెప్పి న మిషెల్.. ఆయనను డీసెంట్ వ్యక్తిగా అభివర్ణించారు. ఆయన గురించి తనకు తెలుసునని, ఆత్మవిశ్వాసంతో పని చేసే బిడెన్ ఈ దేశాన్ని మరింత అభివృధ్ది పథంలో నడిపిస్తారని పేర్కొన్నారు.
ఎన్నికల్లో ట్రంప్ ను ఓడించి జో బిడెన్ ని అధ్యక్షునిగా, కమలా హారిస్ ని ఉపాధ్యక్షురాలిగా ఎన్నుకోవాలని మిషెల్ పిలుపునిచ్చారు. కరోనా వైరస్ కారణంగా ఆన్ లైన్ ద్వారా ఈ ప్రచార కార్యక్రమం జరిగింది.